Свет
Втор круг од претседателските избори во Египет
Во Египет почна гласањето на вториот круг од претседателските избори во кој влегоа Мохамед Морси, лидер на исламистичкото движење Муслимански браќа и Ахмед Шафик, премиер во соборениот режим на поранешниот претседател Хосни Мубарак.
Речиси 50 милиони Египќани во саботата и неделата имаат право да гласаат на изборите на коишто ќе се бира наследник на Хосни Мубарак кој владееше повеќе од три децении а од власта беше симнат во февруари 2011 година.
Гласањето започна без инцидентите во 8 часот по локално време, а избирачките места ќе бидат затворени во 18 часот. Околу 50 милиони египетски гласачи од 80 милиони население, како што се очекува би требало да излезат на 14 илјади избирачки места во 27 провинции.
Станува збор за првите избори во историјата на кои египетските граѓани со коишто низ историјата владееле фараони, султани, кралеви и воени офицери, сега имаат вистинска можност директно да го изберат својот водач.
Изборите се одвиваат во напната атмосфера по две контроверзни одлуки на Врховниот уставен суд на Египет. Со едната беа поништени резултатите од парламентарните избори и беше распуштено Националното собрание (долниот дом на парламентот на Египет), откако уставните судии најдоа дека системот на гласање особено во изборните единиците од кои се дава еден пратеник бил во спротивност со новиот устав на земјата и во нерамноправна положба ги става кандидатите на партиите и независните кандидати. Со другата одлука, пак, на Шафик му се овозможува да биде на власт и покрај законот со кој се забранува кандидирање на припадници на поранешниот режим.
Генералниот секретар на Обединетите нации, Бан Ки-Мун повика на мирни избори во Египет, по масовните протести по прогласувањето на избраниот парламентарен состав за нелегален.
Ки-Мун во своето соопштение вели дека „забележал жива расправа и вознемиреност кај Египќаните поради одлуката на уставниот суд“, а неговиот портпарол Мартин Несирки додаде дека „Генералниот секретар се надева оти вториот круг од претседателските избори ќе се одвива во мирна и отворена атмосфера“.
Со вториот круг од претседателските избори требаше да се заокружи предавањето на власта во рацете на цивилните органи од страна на Врховниот совет на вооружените сили на Египет кој раководи со земјата како преодна власт откако со народниот бунт беше соборен режимот на Мубарак.
И досега, особено младинските движење организираа големи протести обвинувајќи дека воениот врв одолговлекува со предавањето на власта, плашејќи се да не ја загуби повластената позиција во египетското општество со која се стекна во време на четиридецениското владеење на Хосни Мубарак./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Поранешниот директор на Мосад за нападот на Иран: Сите опции се „на маса“
Поранешен директор за разузнавање во израелската разузнавачка агенција Мосад вели дека таргетирањето на нуклеарните објекти во Иран е една од опциите за одговор на нападот врз Израел, пишува „Sky News“.
Зохар Палти зборуваше за можните форми на одговор откако Иран истрела повеќе од 300 проектили и беспилотни летала кон Израел.
Запрашан дали сè е на маса, вклучително и таргетирање на нуклеарни постројки, Палти рече: „Нема прашање. Сè е на маса во моментов“.
Запрашан дали тоа вклучува нуклеарни постројки, тој рече: „Вклучувајќи сè“.
Иран во неделата привремено ги затвори своите нуклеарни постројки од „безбедносни причини“.
Нападот врз Израел уследи по наводниот смртоносен израелски напад врз иранскиот конзулат во Сирија. ИДФ соопшти дека 99 отсто од оружјето испукано кон Израел не успеало да навлезе во неговата моќна противвоздушна одбрана.
Сепак, како што пренесуваат медиумите, израелската влада нема да изврши одмазда за масовниот ирански напад на израелска територија минатиот викенд.
Свет
„Тајмс оф Израел“: Америка ја прифати операцијата на Израел во Рафах, доколку Израел не го нападне Иран
Соединетите Американски Држави го прифатија планот на Израел за копнена операција во јужниот дел на Газа во градот Рафах во замена за неизвршување на голем напад врз Иран, пишува „Тајмс оф Израел“, повикувајќи се на неименуван египетски функционер.
„Американската администрација покажа дека го прифаќа планот што претходно го претстави окупаторската влада во врска со воената операција во Рафах, во замена за неизвршување голем напад врз Иран“, изјави неименуван египетски функционер за катарскиот медиум „Ал Араби ал Џадид“.
Тој додаде дека Египет се подготвува за можните последици од инвазијата на Рафах, каде, според израелските медиуми, се верува дека се наоѓаат четири баталјони на палестинската милитантна група Хамас и над милион цивили кои побегнале таму од другите делови на Појасот Газа, а се сомнева дека таму се и лидерите на Хамас и израелските заложници, пренесува Танјуг.
Израелскиот јавен сервис „Кан“ вчера објави, повикувајќи се на неименуван израелски функционер, дека израелскиот премиер Бенјамин Нетанјаху го променил планот за одговор на нападот на Иран по разговорот со американскиот претседател Џозеф Бајден.
Неименуван израелски функционер појасни дека одговорот на Израел ќе се случи, но дека ќе биде поинаков од планираниот.
Ноќта меѓу саботата и неделата, Иран изврши напад врз Израел со беспилотни летала и балистички и крстаречки ракети како одмазда за нападот на иранскиот конзулат во Дамаск на 1 април, за кој го обвини Израел.
Свет
Полскиот претседател приватно се сретна со Трамп во Њујорк: „Ме покани во неговиот стан“
Полскиот претседател, Анджеј Дуда, изјави дека за време на неговата денешна посета на Њујорк имал приватна средба со поранешниот шеф на американската држава и претседателски кандидат на Републиканската партија, Доналд Трамп.
Изборниот штаб на Трамп ги опиша двајцата мажи како „одлични пријатели“, се вели во соопштението за состанокот, во кое се додава дека разговарале за предлогот на Дуда земјите од НАТО да трошат најмалку три отсто од својот БДП за одбрана.
Дуда, чиј мандат истекува во 2025 година, беше еден од меѓународните партнери на Трамп кога тој беше претседател.
„Доналд Трамп ме покани во неговиот приватен стан, така да се каже. Ова е едноставно приватен состанок во врска со мојот престој овде во Њујорк“, изјави Дуда за новинарите во Њујорк.
Трамп, кому му се суди во Њујорк под обвинение дека го купил молкот на порнографската актерка Сторми Даниелс, е во тесна трка против демократскиот шеф на државата Џо Бајден пред претседателските избори во ноември.
Многу европски лидери веќе долго време се загрижени дека новиот мандат на Трамп може да значи намалување на американската поддршка за Украина, со која се граничи Полска, и за НАТО алијансата.
„Претседателот Трамп со задоволство се присети на неговата значајна посета на Полска во 2017 година и го пофали полскиот народ за цврстата одбрана на неговиот суверенитет и посветеноста на заштитата на европските граници од какви било и сите закани“, се вели во соопштението од изборниот штаб на Трамп.