Свет
Борбите во Дамаск од јужните се преместија во источните делови
Сириската армија го исчисти од борците на опозициската Слободна сириска армија јужното предградие на главниот град Дамаск, Дараја, пренесе во понеделникот државната агенција SANA, додека бутновниците јавија дека собориле хеликоптер над сириската престолнина.
Очевидци изјавиле дека сириските бунтовници во понеделникот урнале хеликоптер на сириската армија додека го ракетирал квартот Џобар во престолнината Дамаск, а потоа дека избувнале жестоки судири меѓу бунтовниците и војската во таа област.
Сириската државна телевизија јави дека се урнал хеликоптер во Дамаск, но не изнесе детали. Очевидци изјавија дека хеликоптерот го зафатил пламен откако бил погоден со проектил и дека се урнал во квартот Кабун.
„Леташе над источните делови од градот и стрелаше целото утро. Борците се обидуваа да го погодат околу цел час и на крајот успеаја“, изјави за Reuters бунтовнички активист именуван како Абу Бакр.
Операцијата на сириската армија за протерување на бунтовниците се спроведуваше последните две седмици во јужните предградија на Дамаск, Дараја, Кафр, Замалка, Арбин, Кафр Ватна, Сакба и др.
„Во сите северо-источни предградија на Дамаск, вклучувајќи ги Кабун и Источна Гута, се одвиваат вооружени судири меѓу владините сили и вооружена опозиција, придружувани од артилериски оган“, јави либанската телевизија Аl-Mayadin, повикувајќи се на својот дописник од главниот град на Сирија.
„Звуците од истрели и експлозии на гранати не престеануваат од минатата ноќ. Утрово недалеку од мојот дом, во близина на џамијата Ал-Гуфан падна хеликоптер на сириската армија. Сето тоа се одвиваше пред нас, се запали и се урна. Се зборува дека го урнале бунтовниците на Слободната армија. Не знам, ние не излегуваме од дома“, изјави во телефонски разговор за руската агенција РИА Новости неименуван жител на населбата Кабун.
Вели дека и тој и неговите соседи не се осмелуваат да ги напуштат домовите и да се сместат во побезбедните населби, бидејќи стравуваат дека нивните куќи ќе бидат ограбени. Со растот на насилствата во Сирија, пљачкосувањата на домовите станаа вообичаена појава во земјата.
„Сепак може да се живее. Електрична енергија и вода има. Со продуктите, пак, е многу полошо. Поголемиот дел од продавниците се затворени. Во нашата населба работат само две продавници, за зеленчук и за намирници, каде што може да се набават млечни производи и конзервирана храна. Месо нема. Леб може да се купи многу тешко“, вели соговорникот на агенцијата.
Според телевизијата Аl-Mayadin, делoви од бунтовничките единици притиснати во понеделникот почнале да се пробиваат во источните предградија на Дамаск. Џобар и Забалатани кои се наоѓаат во центарот на христијанската четврт Баб Тума и се приближиле кон неа од соседната населба на југ Џарамана. Покрај тоа, локалните жители изјавиле дека квартот Баб Тума е гаѓан со минофрлачки гранати истрелани од позициите што ги држат борците на Слободната сириска армија. Во областа дополнително се испратени зајакнати безбедносни сили.
Во понеделникот уште три гранати истрелани од бунтовниците паднале во западните делови на Дамаск, на стратешкиот автопат што ги поврзува главниот град со либанско-сириската граница.
Жестоки судири меѓу владините сили и вооружените опозициски групи се одвиваат и во вториот по големина град Алепо. Таму единици на сириската армија влегле во населбата Баб ел-Хадид во центарот на градот. Во друга населба, Сејиф ал-Даулија, сириската армија ги бомбардира „последните преостанати бунтовнички позиции“, се наведува во извештајот на либанската телевизија.
За периодични борби меѓу владините и опозициските сили, исто така, се известува и во областите Фардус, Калјаса и Масакин Ханан.
Жестоките борби продолжуваат и во центарот на третиот по големина сириски град Хомс, во регионите Карабис и Кусур. Снимките прикажани на телевизијата Al-Mayadin покажуваaт огромни уништувања во овие области направени за време на бомбардирањето. Неколку станбени блокови се само куп урнатини, а повеќето домови поради големината на оштетувањата не се погодни за живеење./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Атина во густ облак од прашина и песок од Сахара
Главниот град на Грција, Атина, се најде во облак од прашина и песок од пустината Сахара и Северна Африка, феномен кој е проследен со особено високи температури.
Воздухот во градот треба да се подобри од утре наутро, велат метеоролозите.
„Во пролет март-април, циклоните, кои се движат кон исток по северноафриканскиот брег, носат прашина кон источен Медитеран. Типична песочна бура со дострел од 200 километри носи од 20 до 30 милиони тони прашина, понекогаш и до 100 милиони“, објаснува директорот на Грчката метеоролошка служба, Теодорос Колидас.
Главниот град често се наоѓа на патот на тие песочни бури, но оваа година беше проследен со особено високи температури поради што е речиси невозможно да се дише.
Во центарот на Атина на 27 март беа забележани 25,3 Целзиусови степени, што е рекорд од март 2009 година, а на Крит температурите достигнаа и до 32 степена, истакнаа од Грчката метеоролошка служба.
Сојузот на пулмолозите на Грција препорача најранливите групи население, особено луѓето што страдаат од астма, да избегнуваат „непотребни движења и спортови на отворено кога концентрациите на прашина се највисоки“.
„Африканската прашина носи честички кои може да се интегрираат со полен, бактерии и габи создавајќи многу токсична и опасна смеса за човечкото тело, а особено за респираторниот систем“, предупредува Сојузот.
Свет
Апсења во Пакистан по снимка во која брат ја убива сестрата, таткото гледал сè
Пакистанската полиција уапси татко и брат откога видеото од провинцијата Пенџаб, на кое брат ја дави својата сестра додека таткото гледа, стана вирална, соопштија официјални лица.
Настанот предизвика шок и бес во нацијата, која се бори со бранот насилство врз жените. 22-годишна девојка била убиена од својот брат додека таткото гледал, а непознато трето лице го снимило злосторството, изјави за ДПА претставникот на локалната полиција, Рана Акмал.
Инцидентот се случил во градот Тоба Тек Синг минатата недела. Семејството ја закопало жената тврдејќи дека умрела од колера.
И таткото и братот ѝ кажале на полицијата дека со години ја силувале жената и ја убиле за да го скријат своето злосторство, изјави полицискиот службеник Мохамед Имран.
Се спроведуваат рации за апсење на лицето, кое наводно го снимило злосторството.
Регион
Родителите на двегодишната Данка во полиција во Бор: мајката одбила полиграф
Родителите на исчезнатата двегодишна Данка Илиќ се донесени во полициската станица во Бор, објави „Телеграф.рс“.
Тие не се осомничени, но со нив се врши информативен разговор.
Ивана и Милош вчера дадоа исказ во присуство на Центарот за социјална работа.
Како што објави српски „Телеграф“, мајката го одбила полиграфскиот тест бидејќи е бремена.
„Девојчето Данка Илиќ сè уште не е пронајдено. Апелираме до сите луѓе да не објавуваат информации што не се проверени. Со тоа се нарушува и се загрозува истрагата, во која е инволвиран и Одделот за криминалистичка полиција“, изјавиле за „Телеграф.рс“ од српската полиција.