Свет
Франција ќе признае влада на сириската опозиција
Францускиот претседател Франсоа Оланд ја повикува сириската опозиција да формира преодна влада и изјави дека е подготвен да ја признае, заканувајќи се дека доколку власта во Дамаск употреби хемиско оружје, тоа ќе биде повод за интервенција во земјата.
„Франција бара од сириската опозиција да се формира преодна влада, репрезентативна, која би можела да биде легитимен претставник на нова Сирија Франција ќе ја признае новата влада на Сирија штом таа ќе биде создадена“, изјави францускиот претседател Франсоа Оланд говорејќи на 20-та годишна конференција на амбасадорите на Франција.
Притоа Оланд изјави дека можната употреба на хемиско оружје од страна на сириските власти ќе претставува основа за воена операција.
„Остануваме будни за да го предупредиме (сирискиот) режимот да го употреби хемиското оружје, што ќе претставува легитимна оправданост за меѓународната заедница за директна интервенција“, рече Оланд.
Тој, исто така, рече дека Франција „ќе продолжи колку што е потребно, да врши притисок и да ги убеди (партнерите) во Советот за безбедност на ОН да се постигне консензус на меѓународната заедница“.
Претходно, американскиот претседател Барак Обама изјави дека разместувањето или целосната употреба на хемиско оружје во Сирија ќе биде „црвената линија“ за САД, по што Вашингтон може да го преиспита својот досегашен пристап кон решавање на сирискиот конфликт. Некои медиуми ги толкуваа овие зборови како декларирање подготвеност за преземање воена интервенција во Сирија, но веќе следниот ден Белата куќа го негираше тоа и побара од медиумите да не се толкуваат премногу слободно изјавите на претседателот на САД./крај/рн/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Разузнавачки извор за „Си-ен-ен“: Директните напади меѓу Израел и Иран завршија
Регионален разузнавачки извор рече дека директните напади меѓу Израел и Иран се завршени.
Изворот разговарал за Си-Ен-Ен под услов да остане анонимен околу два и пол часа по објавувањето на нападите. Изворот вели дека, според неговите сознанија, не се очекува Иран да одговори на нападот, но не наведе причина.
Претходно и висок ирански функционер изјави за Ројтерс дека „Иран нема план за итна одмазда против Израел“.
Израел се уште не потврдил дека го извршил нападот врз Иран, а тврдењата за нападот дојдоа од Вашингтон.
Од друга страна, од Иран доаѓаат контрадикторни информации, но нема официјален извештај.
Пред само еден час, ирански аналитичар изјави за иранската државна телевизија дека „мини-дроновите соборени од противвоздушната одбрана во Исфахан биле управувани од инфилтратори од Иран“.
Претходно, пак, ирански функционер изјави за Ројтерс дека немало ракетен напад и дека експлозиите биле резултат на активирање на иранските системи за противвоздушна одбрана.
Свет
Украина тврди дека соборила руски бомбардер
Украинските воздухопловни сили денеска соопштија дека собориле руски стратешки бомбардер првпат од почетокот на руската инвазија, а Москва објави дека авионот се урнал поради технички дефект и дека еден член на екипажот загинал.
„Првпат противвоздушните ракетни единици на Военото воздухопловство во соработка со одбранбеното разузнавање на Украина го уништија стратешкиот бомбардер со долг дострел ‘ту-22М3’, кој носи крстосувачки ракети ‘Х-22’“, изјави командантот на украинските воздухопловни сили на „Телеграм“.
Украинската воена разузнавачка служба (ГУР) соопшти дека рускиот авион „бил соборен благодарение на специјалната операција спроведена од украинското одбранбено разузнавање во соработка со воздухопловните сили“.
Руското Министерство за одбрана не потврди дека украинската страна нападнала еден нејзин авион, но воен извор изјавил за новинската агенција ТАСС дека бомбардерот „туполев-22М3“ се урнал во регионот Ставропол по борбена мисија додека се враќал во базата. Според овој извор, авионот не носел оружје.
Свет
САД ставија вето на приемот на Палестина во ОН
Соединетите Американски Држави ставија вето на нацрт-резолуцијата на Советот за безбедност на Обединетите нации „Државата Палестина да биде прифатена како членка на ОН“.
Воздржани беа Велика Британија и Швајцарија, а „за“ гласаа Словенија, Сиера Леоне, Русија, Јужна Кореја, Мозамбик, Малта, Јапонија, Франција, Гвајана, Еквадор, Кина и Алжир.
Претходно вчера, заменик-портпаролот на американскиот Стејт департмент, Ведант Пател, потврди дека Вашингтон ќе стави вето на гласањето во Советот за безбедност на ОН наведувајќи дека нема едногласно мислење меѓу членовите на комитетот за тоа дали Палестинците ги исполнуваат критериумите неопходни за да бидат дефинирани како држава.
Палестинската управа (ПА) го осуди потегот нарекувајќи го „нефер, неетички и неоправдан“.
Кабинетот на претседателот на палестинската управа, Махмуд Абас, го нарече американското вето „еклатантна агресија …туркање на регионот преку работ“.
Израелскиот министер за надворешни работи, Израел Кац, го пофали американското вето додавајќи: „Срамниот предлог беше отфрлен. Тероризмот нема да биде награден“.