Свет
Во Грузија 14 загинати во судир меѓу полицијата и вооружена група
Тројца грузиски полицајци и 11 припадници на вооружена група којашто од руската кавкаска република Дагестан загинале во средата во Грузија во судир во близина на грузиско-руската граница, соопшти министерството за внатрешни работи во Тбилиси.
„Сé уште не знаеме кои се овие луѓе и зошто влегле на грузиска територија“, изјавил за локалните медиуми заменик министерот за внатрешни работи на Грузија, Нодар Карцихаладзе. Појаснил дека групата влегла од Дагестан каде што инаку дејствуваат радикални исламистички групи.
Грузиските власти не ја обвинија Москва дека стои зад нападот, иако односите меѓу двете земји и натаму остануваат непријателски по кусата војна од август 2008 година кога руската армија интервенираше на грузиска територија по операциите на Тбилиси во покраината Јужна Осетија којашто прогласи независност од Грузија.
Во судирот од средата покрај загинатите, уште пет полицајци на Грузија се ранети, а шест припадници на вооружената група се опколени.
„За време на спроведување на операцијата за гонење вооружена група, убиени се тројца припадници на специјалните сили на Министерството за внатрешни работи, а беа повредени пет лица. Што се однесува до групата диверзанти, до моментов се ликвидирани 11 нејзини припадници. Уште шест диверзанти се опкружен во акцијата за нивно апсење…“, го цитира грузиската агенција на руски јазик Новости-Грузија соопштението на министерството за внатрешни работи на Грузија.
Претходно, грузиската полиција соопшти дека во операција во близина на границата Дагестан биле ослободени заложници од кои снимка е поставена на интернет страницата на министерството за внатрешни работи, кои во видео сведоштво кои кажуваат детали од нивното киднапирање.
„Ослободените заложници велат дека биле заробени од страна на вооружени лица, а вооружените диверзанти им се заканиле дека ќе ги убијат доколку дадат отпор или се обидат да побегнат“, наведува грузиската полиција. Во веста не се прецизира дали сите заложници се ослободени како и нивниот број
Грузиски медиуми објавија дека според неофицијални извори, на грузиска територија се инфилтрирала група од околу 20 добровооружени милитанти од Дагестан. Во последниве денови, милитантите земале во заложништво три групи локални жители, со вкупно десет лица. Претходно била ослободена една група од пет лица, потоа уште една група, а според грузиската телевизија Имедиа во моментов уште неколку лица се во заложништво на ред и диверзантската група./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Русија: Ќе ги таргетираме украинските магацини во кои се доставува западното оружје
Русија ќе ги интензивира нападите врз украинските бази за складирање во кои е сместено оружјето доставено од Запад, изјави денеска министерот за одбрана, Сергеј Шојгу, а Соединетите Држави се подготвуваат да одобрат и достават долго одложувана нова воена помош.
Шојгу рече дека Русија „го отфрли митот за супериорноста на западното оружје“ и дека нејзините сили презеле иницијатива на фронтот долг 1.000 километри.
Тој алудира на фактот дека в сабота, по гласањето во Претставничкиот дом, Вашингтон е подготвен да достави нов пакет воена помош за Украина, вреден речиси 61 милијарда долари.
Украинскиот претседател Володимир Зеленски изјави дека Киев набргу ќе добие повеќе ракетни системи со долг дострел ATACMS како дел од ветениот пакет. Американските власти рекоа дека помошта ќе вклучува испорака на муниција и пресретнувачи за системи за противвоздушна одбрана за Украина.
„Со оглед на заканите од САД и нивните сојузници, ние мора да продолжиме да ги подобруваме составот и структурата на вооружените сили и да го зголемиме производството на најпопуларното оружје и воена опрема“, рече Шојгу додавајќи дека руските сили „ќе го зголемат интензитетот на нападите врз логистичките центри и базите за складирање на западното оружје“.
Рускиот министер за одбрана повтори дека Русија овој месец ги освоила селата Первомајске, Бохданивка и Новомихајливка.
Во понеделникот украинскиот командант го негира падот на Новомихајливка велејќи дека неговите војници сè уште држат 15- 20 отсто од селото.
Руското Министерство за одбрана објави дека руските маринци, кои учествувале во заземањето на Новомихајливка, заробиле оружје од западно производство, вклучувајќи шведски фрлачи на гранати, американски противоклопни системи Javelin и системи за електронско војување на НАТО.
Европа
Првиот разузнавач на Германија: Русите се подготвени и за саботажа
Кинезите се активни во Германија во собирање информации за воената технологија, изјави за „Дојче веле“, Томас Халденванг, претседател на Сојузната канцеларија за заштита на Уставот, домашната разузнавачка служба на Германија.
Халденванг зборуваше за апсењето тројца германски државјани поради сомнение дека на Кинезите им откриле информации за нови технологии, кои може да се користат за воени цели.
„Ова е случај од особено значење. Се занимаваме со проширување на активностите, се работи за знаење за производство на оружје“, додаде тој.
Халденванг разговараше за „Дојче веле“ пред новото апсење во врска со наводното кинеско шпионирање. Во вторникот вечерта, помошник на европскиот претставник на Алтернатива за Германија (AfD) беше уапсен во Дрезден за давање информации на Кинезите.
Тоа беше само продолжение на шпионските игри во последно време. Претходно, двајца руско-германски државјани беа уапсени во Баварија под сомнение дека снимиле американски воени бази во Германија и подготвувале напад.
„Со години забележуваме дека Русија има развиено големи активности овде во Германија“, вели Халденванг. „Уште пред војната во Украина реков дека заканата е слична на онаа од времето на Студената војна“.
„Се разбира, сè беше интензивирано со рускиот напад врз Украина и мораме да разбереме дека Русија се занимава со шпионажа, сајбер-шпионажа, операции за влијание, дезинформации“, продолжи првиот човек на германската разузнавачка служба.
Според него, Германија е особено нападната како важен играч во воената и политичката поддршка за Украина. Украинските војници се обучуваат и во Германија.
Халденванг рече дека во екстремен случај рускиот репертоар вклучува саботажа. „Може да се смета дека витален интерес на Москва е да ја спречи или попречи испораката на оружје за Украина. А земја што е подготвена да води војна со најбрутални средства сигурно нема да се оддалечи од саботажа. Така и ние во Германија мораме да бидеме подготвени за тоа сценарио“.
Како што наведе, германските служби се во состојба на готовност и веќе на почетокот на војната во Украина прогласиле „голем број руски агенти“ за непожелни, што ги „ослабнало можностите на руските служби во Германија“.
Како што додаде Томас Халденванг за „Дојче вече“, исламистички групи и поединци се на радарот на службата поради можни терористички напади. Особено што летово претстојат два големи спортски настана: Европското фудбалско првенство во Германија и Олимписките игри во Париз.
„И на тоа поле нивото на закана е високо. Во моментот, иако не се познати конкретни планови за напад, апстрактната опасност е исклучително висока“, додаде тој.
Тој изјави дека особено Исламската држава Корасан, активна во Авганистан и Пакистан, се залага за голем, спектакуларен напад.
„Можеме да замислиме разни сценарија. Едно многу опасно е, на пример, тимови на напаѓачи да доаѓаат во Германија, можеби некои веќе дошле, а потоа да извршат напад како група“, рече Халденванг.
Други сценарија вклучуваат радикализација на поединци, додаде тој. Како една од новите причини за радикализација тој ги наведе ситуацијата во Појасот Газа и пропагандата на исламистичките групи, кои поттикнуваат поединци да вршат напади.
Свет
(Видео) Сателитски снимки пред и потоа ги откриваат вистинските размери на катастрофата во Дубаи: поплавите го запреа животот
Невидени обилни врнежи од дожд поплавија делови од Обединетите Арапски Емирати минатата недела, со што животот беше запрен во Дубаи и други делови од пустинското кралство. Како што пренесува Си-ен-ен, најголемите регистрирани поплави во ОАЕ биле толку интензивни што можеле да се следат со денови преку сателити од вселената откoga облаците се расчистиле и паднале последните капки дожд.
Во Дубаи – најнаселениот град во земјата, за 12 часа наврна дожд колку за една година, а околните области имаа речиси двојно повеќе врнежи за 24 часа.
Најобилни врнежи имаше во областите северно и источно од главниот град на земјата, Абу Даби. Вкупните врнежи од 100 до 200 милиметри беа вообичаени, но неколку локации забележаа речиси 250 милиметри дожд на квадратен метар.
Поплавите бргу се зголемија и полека се повлекуваа како резултат на историскиот потоп, кој беше најекстремниот настан во земјата од водењето евиденција пред 75 години. Помалку од два дена по престанувањето на дождот, сателитот „Ландсат 9“ помина над ОАЕ во петокот на 19 април и сними снимки од големи базени создадени од поплавите. Сателитот собира детаљни снимки од површината на Земјата и е управуван од НАСА и Геолошкиот институт на САД.
Темносините базени на фотографиите ги истакнуваат водите од поплавите, кои се во целосна спротивност на типично сувата почва во регионот, која изгледа кафеава или светлокафеава. Прикажаната поплава е во најјужниот дел на Дубаи, но високоурбанизираниот централен центар на градот не е заробен. Овие снимки се направени од сателитот „Ландсат 9“ и се обоени за да се потенцира присуството на вода на суво. Прикажаните бои не се толку верни како што би изгледале на самото место што гледа од вселената, но тие го олеснуваат забележувањето на разликите на површината.
Сателитот забележа и значителни поплави во Абу Даби. Малите, плитки водни тела се светлосини. Поголемите и подлабоки базени со вода од поплавите се темносини. Големи површини на сува, кафеава почва исто така стануваат зелени по врнежите. Ова веројатно покажува дека почвата во многу области ја задржала влагата од дождот, иако тие не биле целосно поплавени.
Силниот дожд е поврзан со поголем систем на бура минатата недела што го премина Арапскиот Полуостров и се пресели преку Оманскиот Залив. Истиот циклон донесе смртоносни поплави и во блискиот Оман, каде што загинаа најмалку 18 лица. Екстремните врнежи како овие стануваат сè почести како што се загрева атмосферата поради климатските промени предизвикани од човекот. Потоплата атмосфера може да апсорбира повеќе влага како крпа и потоа да ја ослободи во форма на обилни врнежи.