Свет
Сомалиските исламисти истерани од последното упориште
Исламистичката бунтовничка група ал-Шабаб го напушти стратешкото пристаниште Кисмаи, нејзиниот последен бастион во Сомалија, 24 часа по почетокот на нападите на силите на Африканската унија, изјави во саботата претставник на исламистичкото герилско движење.
Ова повлекување е уште едно во серијата воени неуспеси коишто последната година ги претрпе исламистичката група ал-Шабаб којашто е поврзана со глобалната терористичка организација Ал Каеда што се обиде да ги надомести со постојани напади врз главниот град на Сомалија, Могадишу или на територијата на соседна Кенија.
„Воената команда на муџахедините на ал-Шабаб нареди тактичко повлекување од Кисмаи“, изјави за AFP портпаролот на движењето, Али Мохамуд Раџ.
Повлекувањето го потврдиле и неколку жители на големото пристаниште во јужниот дел на Сомалија.
„Не знаме во кој правец заминаа, меѓутоа рано наутро последното воено возило на ал-Шабаб го напушти градот…, дури ниту нивното локално радио веќе не емитува програма“, изјави локален жител на Кисмаи, кој се претставил како Хасан Али.
Борците на ал-Шабаб во петокот започнаа борби со припадниците на кенискиот контигент кој истовари ноќта во четвртокот кон петокот на најмалку две плаќи во близина на градот, а потоа градот го нападнаа и силите на сомалиската влада.
Ал-Шабаб беше потиснат од главниот град Могадишу во август минатата година. Ова движење се бори против силите на Африканската унија и во другите делови на Сомалија./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.