Претседателот на Србија, Александар Вучиќ ги осуди синоќешните протести организирани пред Националното собрание, оценувајќи ги како акт на политичко насилство.

„Синоќа во Белград бевме сведоци на најбрутално политичко насилство во последните неколку години. Во изминатите осум години, Република Србија целосно ја почитуваше слободата на собирање и демонстрација, како и различно мислење“, рече тој, додавајќи дека некои насилството се обиделе да го оправдаат со коронавирусот.

Вучиќ нагласи дека полицијата реагирала дури кога собраните лица почнале да ја вандализираат зградата на Националното собрание.

Тој во обраќањето до јавноста зборуваше и за вклученоста на странски фактори во настаните пред собранието.

„Не се сомневам дека оние кои работеа на ова синоќа имаат за цел да ја ослабат позицијата на Србија. Имаме докази за вклученост на одредени функционери од некои регионални служби, а за се друго можеме да зборуваме подоцна, кога нашите служби ќе ја направат анализата“, посочи тој.

Вучиќ ги повика луѓето да не излегуваат на новиот протест кој е најавен за вечерва, со оглед дека денеска е втор најлош ден во земјата во однос на бројот на новозаразени.

„Ги молам луѓето да не излегуваат за да не се појават понатамошни ужасни инфекции. Денес е нашиот втор најлош ден со 357 заразени од 8.600 тестирани. Единаесет починаа. На респиратори има 118 пациенти“, истакна српскиот претседател.

Турската војска почна со ново теренско тестирање на своите системи за воздушна одбрана „С-400“ купени од Русија против американски борбени авиони Ф-16 и Ф-4 во воздухопловната база „Муртед“ во близина на Анкара, објави авијацискиот блог „Fighter Jets World“, повикувајќи се на разузнавачки информации.

Според порталот, тестирањето почнало на 4 јули, а треба да продолжи до 26 ноември. Турција продолжила со тестирањето и покрај предупредувањата од Вашингтон дека активирањето на С-400 може да резултира во нови санкции против Анкара.

Турската влада остана без коментари во врска со тестирањето. Од таму соопштиле само дека Ф-16-те и другите авиони на турските воздухопловни сили ќе изведуваат тест-летови на мала и голема надморска височина во близина на Анкара, во рамките на некои проекти спроведени во координација со претседателството на одбранбените индустрии.

Сепак, неавторизирана фотографија покажува  американски авион што лета над „Муртед“ додека компонентите С-400, вклучувајќи ги и радарите 91N6E и 96L6E, работат на земја.

Познато е дека турската војска почна со тестирање на своите С-400 против американските борбени авиони уште во ноември 2019 година, при што TRT World објави снимка од радарите на системот за воздушна одбрана што работат додека авионите прелетуваат.

Обемот на тестирањето не беше веднаш јасен бидејќи Турција планираше да ги стави своите С-400 целосно во функција до април годинава иако беше објавено дека тестирањето се однесува на воспоставување вкрстена компатибилност меѓу платформите за да се избегнат ситуации на пријателски оган.

Првиот вицепремиер и министер за внатрешни работи на Чешката Република, Јан Хамачек, одби да ги коментира извештаите дека Иван Сафронов, советник на шефот на „Роскосмос“ и поранешен дописник на весниците „Комерсант“ и „Ведомости“, им доставувал информации на специјалните служби на Чешка, објави „ Деник Н.“.

„Немам коментар“, изјави Хамачек.

Адвокатот на Сафронов, Иван Павлов, претходно изјави за ТАСС дека во досието за случајот на неговиот клиент, САД се споменуваат како земја што добила тајни информации преку чешките специјални служби.

Сафронов беше приведен на 7 јули утрото додека го напуштил станот. Службата за односи со јавност на Федералната служба за безбедност на Русија (ФСБ) информираше дека Сафронов е осомничен дека му предал доверливи државни тајни на претставник на една од разузнавачките служби на НАТО и бил уапсен од агенти на ФСБ.

Обвинителството започна кривична постапка по обвинението за државно предавство против Сафронов, кој сега се соочува со 20 години затвор. ФСБ додаде дека истрагата продолжува. Претходно, „Роскосмос“ информираше дека Сафронов е уапсен, но нагласи дека апсењето не е поврзано со неговите тековни должности како советник на компанијата.

Адвокатот Евгениј Смирнов подоцна изјави дека ФСБ се сомнева во Сафронов за пренесување на информации на чешките специјални служби за испорака на оружје од Русија кон Блискиот Исток и Африка. Сафронов се изјасни за невин пред судот. Според извор на ТАСС, тој одбил да соработува за време на сослушувањето.

Генералниот директор на „Роскосмос“, Дмитриј Рогозин, во вторникот изјави дека Сафронов, кој претходно работел за „Комерсант“ и „Ведомости“, бил поканет да ги покрива активностите на „Роскосмос“ пред месец и половина и немал пристап до класифицирани информации.

„Не се сомневав во неговиот висок професионализам и лична пристојност“, додаде Рогозин.

Рускиот весник „Комерсант дејли“, каде Сафронов работел помеѓу 2010 и 2019 година, издаде изјава за поддршка на Сафронов, нарекувајќи го вистински руски патриот. Руските весници „Ведомости“ и „Новаја газета“, медиумската група РБК и ТВ каналот „Дожд“, исто така, ја објавија својата поддршка за Сафронов.

Дел од поранешните колеги на Сафронов се собраа пред седиштето на ФСБ во центарот на Москва во вторникот попладне за да покажат солидарност. Неколку новинари, вклучително и од „Комерсант“, беа приведени во текот на протестите.