Разрешениот претседател на Украина, Виктор Јанукович, во своето обраќање пред новинари од југот на Русија, го обвини Западот дека бил коодинатор на опозицијата во Украина и истакна дека бил приморан да ја напушти земјата поради опасноста по неговиот, но и животот на неговото семејство и роднини.

„Терор, хаос и безвластие се резултатот од протестот во Киев”, рече Јанукович и додаде дека сега власта во Украина е во рацете на националистичко и профашистичко малцинство.

Според него, новоформираниот парламент е нелегитимен.

Јанукович истакнал дека му е жал и дека се срами што не успеал да го спречи хаосот во Украина. На новинарско прашање што мисли за случувањата на Крим, Јанукович изјавил дека смета оти Крим треба да остане во составот на Украина.

Присутните новинари во салата го прашаа дали остварил средба со рускиот претседател, Владимир Путин, на што тој истакнал дека немал средба со него, но дека разговарале телефонски, додавајќи дека е изненаден поради тоа што Путин сé уште молчи за случувањата во Украина.

Со самото појавување на прес-конференцијата во Ростов на Дон, официјално се потврди дека Јанукович се наоѓа во Русија.

Во петокот главното обвинителство на Украина соопшти дека бара од Русија да и’ го екстрадира Јанукович доколку се потврди дека тој е на територијата на оваа земја.

„Нема да барам воена помош од Русија. Ќе се вратам во Украина кога јас и мојата фамилија ќе се чувствуваме безбедно”, изјави разрешениот претседател.

Исто така, тој нагласи дека полицијата, како и специјалната единица Беркут, не ги нападнала демонстрантите, туку дека само делувала во самоодбрана.

„Ниту една власт не е вредна за пролевање на крв. Никогаш не дадов наредба полицијата да пука”, нагласи Јанукович.

За време на конференцијата, Јанукович неколкупати повтори дека тој се уште е легитимен претседател на Украина, а изјави и дека не поседува сметки и имот во странство.

Одговарајќи на новинарско прашање, тој кажа дека нема да учествува на претседателските избори кои ќе бидат одржани во Украина во мај и оцени дека тие избори се „незаконски”./крај/мф/ап