Свет
Смиленски опустоши цели региони во источна Македонија
Над 5.800 работници останаа без работа откако сопственик на фирмите стана контроверзниот бизнисмен
Над 5.800 работници останаа без работа откако сопственик на фирмите стана контроверзниот бизнисмен
ШТИП – Текстилни фабрики и картонажи, свињарски, краварски и живинарски фарми, илјадници хектари плодно земјиште, фабрики за сточна храна и други стопански капацитети, лоцирани главно во источниот дел на Македонија, беа дел од сега распаднатата бизнис-империја на Методија Смиленски, контроверзен македонски бизнисмен кој има своја фирма во Виена. Над 5.800 работници останаа без работа откако сопственик на фирмите стана Смиленски, кој беше уапсен на аеродромот во Белград.
Методија Смиленски е бизнисмен кој се товари дека со комбинација на бројни махинации и злоупотреби станал сопственик на огромен број фирми кои ги опустошувал по кусо време од своето влегување во нив. Најголеми штети од него претрпеа фирмите во Свети Николе. Во овој град луѓето велат дека ни најсилен ураган не можел да им нанесе толкава економска штета како што го направил тоа Смиленски. Тој на ова подрачје, како бизнисмен кој ветува, стартуваше кон крајот на деведесеттите години на минатиот век, кога ја купи фабриката за сточна храна „Зелоп", а која беше дел од имотот на комбинатот „Овче Поле". Дотогаш фабриката работеше добро, но Смиленски само за една година ја затвори, а вработените започнаа штрајк, но без резултат. Потоа Смиленски фрли око на друг вреден имот во Свети Николе. Стана сопственик на краварската и на живинарската фарма во селото Ерџелија. Во краварската фарма Смиленски наследи 320 молзни крави, а по една година стадото се намали на стотина кои беа одземени со интервенција на полицијата, бидејки тој станал голем должник кон Дирекцијата за стоковни резерви. Стотина работници реагираа, интервенираше и полицијата за да се изнесат кравите, а фармата денес е опустошена. Живинарската фарма која имаше 78.000 несилки денес, исто така, е затворена.
Големи трауми и губење на работните места доживеаја и околу 1.100 вработени во текстилната фабрика „Снитекс". Оваа фабрика беше позната како фабрика на Смиленски, а тој тврдеше дека во неа поседува само 41 отсто од акциите. Но, во фабриката постоеше и нелегитимиран газда со 25 отсто акции, за кого познавачите зборуваа дека е човек на Смиленски. „Снитекс" одамна не работи, работниците долго штрајкуваа, еден штрајкувач дури и почина за време на протестите, но фабриката не доживеа нов стопански живот. Сега таа стои како опомена на едно проблематично време. И Фабриката за картонажа „Картонтекс" се вброи во списокот на неговиот незаситен апетит. Фабриката која важеше за најдобра во својата бранша стана креатура од стопански субјект. Контроверзниот бизнисмен стана сопственик и на земјоделското стопанство „Мустафино", кое денес не функционира. Пред парламентарните избори 2002 година, тогашниот министер за земјоделство Марјан Ѓорчев му даде на Смиленски под концесија 870 хектари најплодна земја во атарот на Мустафино. И земјата остана необработувана.
Мошне индикативен беше влезот на Смиленски во најатрактивното друштво останато од некогаш големиот штипски текстилен комбинат „Македонка" во Штип. Тој во придружба на тогашниот премиер Љупчо Георгиевски двапати престојуваше во „Македонка џинс", носејќи странски партнери кои, според неговото тогашно кажување, требало да му дадат нов импулс на друштвото. Тој тврдеше дека станал сопственик на „Македонка џинс", вложувајќи 20 милиони долари. Подоцна се покажа дека неговиот влог бил лажен, но откако успеал да ги завери документите за сопственост кај надлежниот суд (останува прашањето како му успеало тоа), тој го ставил имотот под хипотека во Радо банка, од каде што зел кредит во поголем износ. Во шемата се вклучува и тогашниот гувернер на НБМ Љубе Трпевски, кој за кредитот на Смиленски дал банкарска гаранција од 11,6 милиони долари. За разлика од другите фирми кои Смиленски ги упропасти, „Македонка џинс" опстои благодарение на упорниот штрајкувачки одбор кој сам изнајде деловен партнер од Турција, а на Смиленски не му дозволи повеќе да влегува во фабриката.
Смиленски своите бизниси од Свети Николе и од Штип ги прошири кон Виница и Берово. Во Виница стана сопственик на „Трико", фабрика за трикотажа, која во тоа време имаше 700 вработени. Кусо време по неговиот влез фабриката беше ликвидирана. Оваа фабрика беше купена од непозната компанија „Топ груп" од Лихтенштајн. Подоцна се покажа дека станувало збор за компанија чиј основач бил токму Смиленски. Тој стана сопственик и на трикотажната фабрика „Беровчанка" во Берово, која, како и сите фирми купени од него, пропадна.
Бизнисмени од Свети Николе тврдат дека ексгувернерот Трпевски е најзаслужен за тоа што неговиот голем пријател Смиленски станал сопственик на фабриката за масло „Продекс" во Свети Николе. За опремата на оваа фабрика НБМ дала гаранција за кредит од 1,3 милиони евра кај Радо банка. Но, една подоцнежна стручна експертиза покажала дека не станува збор за нови машини, туку дека старите биле само пребојадисани. Само по една година Трпевски дал нова гаранција за нов кредит со кој Смиленски навистина купил нова опрема.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.