Свет
„Телеком" незаконски наплаќа манипулативен трошок
„Македонски телекомуникации" незаконски во јулските телефонски сметки пресмета манипулативен трошок
ВЕРЧЕ ГЕОРГИЕВСКА
„Македонски телекомуникации" незаконски во јулските телефонски сметки пресмета манипулативен трошок. Во сметките за изминатиот месец, кои граѓаните и фирмите почнаа да ги добиваат деновиве, фиксниот оператор требаше да го исфрли овој трошок врз основа на решението кое го донесе Комисијата за заштита на конкуренцијата. Станува збор за манипулативен трошок во висина од 2 отсто од реализираниот сообраќај, кој „Телеком" го наплатува како надоместок за покривање на трошоците за изготвување и достава на телефонските сметки до граѓаните и фирмите. Но, телекомуникациската компанија не го почитува решението на Комисијата за заштита на конкуренцијата и во сметките за изминатиот месец повторно ја остави ставката со која неосновано прибираат пари за тоа што ги печатат и дистрибуираат телефонските сметки. Во изминатата година, само по оваа основа, „Телеком" на своето конто инкасирал 1,6 милион евра, а во јануари годинава, пак, наплатил 277 илјади евра.
Од Комисијата за заштита на конкуренцијата истакнуваат дека „Телеком" е принуден да го почитува нивното решение. Во спротивно, најавуваат дека ќе поведат прекршочна постапка до Основниот суд согласно со одредбите на Законот за заштита на конкуренцијата. Тоа значи дека ако навистина се утврди дека не го спроведува решението, „Телеком" ќе се соочи со парична казна во висина до 10 отсто од вкупните приходи во 2005 година. Комисијата за заштита на конкуренцијата, постапувајќи по службена должност, поведе постапка против „Телеком" уште во почетокот на годинава заради утврдување на поседување и злоупотреба на доминантната позиција на пазарот. Притоа, констатира дека „Телеком", кој фактички има доминантна улога, ја злоупотребува таквата позиција и незаконски наплаќа средства од граѓаните на име манипулативен трошок за печатење и дистрибуирање на сметките.
„Пресметувањето и наплатувањето на средства во висина од 2 отсто од реализираниот сообраќај, како посебен надоместок на име манипулативен трошок, претставува злоупотреба на доминантната позиција согласно со Законот за заштита на конкуренцијата. Затоа на фиксниот оператор му се забранува да им пресметува и наплатува на претплатниците на јавни телефонски услуги за изготвување на сметките", објаснуваат во Комисијата за заштита на конкуренцијата.
Од Регулаторното тело за заштита на конкуренцијата велат дека првичната одлука за забрана за наплатување манипулативен трошок е донесена уште во април годинава, по што „Телеком" ја обжалил. Комисијата ја отфрли жалбата и во јуни донесе ново решение кое е обврзувачко за компанијата, која е принудена од јулските телефонски сметки да го исфрли овој трошок. Надлежните од „Телеком" ја прифатиле ваквата одлука и само усно гарантирале дека ќе ја спроведат. Но, ништо од нивната гаранција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.