Покрај фамозната Станислава Полетан, уште една Македонка родена во Србија и еден српски државјанин биле директно инволвирани во шверцот со половина тон кокаин што беше запленет на Блаце.

ГОРАН АДАМОВСКИ ЉУБИША СТАНКОВИЌ

Покрај фамозната Станислава Полетан, уште една Македонка родена во Србија и еден српски државјанин биле директно инволвирани во шверцот со половина тон кокаин што беше запленет на Блаце. Двајцата нови актери во милионскиот шверц заедно со вевчанката од Белград, која е во бегство, биле дел од синџирот на шверцот со висококвалитетен кокаин вреден 100 милиони евра. Се’ уште не се знае кој стои зад фиктивната фирма во Солун која го нарачала увозот на поликолор боја од Венецуела. Македонската полиција ги доставила сите податоци со кои располагала до своите грчки колеги, кои понатаму ќе го составуваат мозаикот. Во фактурите на пријавената стока, односно пратката со поликолор, пријавена е вредност од 26.000 евра, а како набавувач е наведена фиктивната фирма „Сироус компани“ од Солун. Владата одлучи да ги награди оперативците од МВР и од царинската управа со по 5.000 евра, кои директно учествуваа во заплената на кокаинот.

Полицијата потврди дека двајца државјани на Србија, чиј идентитет не се открива во интерес на истрагата, и’ помагале на Полетан во транспортот на шверцот. Станува збор за Србинка со македонско потекло, која заедно со уште едно лице извршила претходна проверка на трасата, а, веројатно, тие биле и придружба на паднатиот шлепер. Во меѓувреме, српската полиција се обидува да ја лоцира кумашинката на Аркан, Станислава Чочоровска-Полетан (38), сопственичка на фантомската фирма „Макфут“, која го организирала транспортот на дрогата од Бар, Црна Гора, до Солун. Наши сознанија говорат дека адресата на фирмата на Чочоровска е на нејзин стан, кој таа пред десетина години, наводно, го купила од таткото на својата кума, фолк-пејачката Светлана Ражнатовиќ-Цеца.

Македонската полиција демантира дека рекордната заплена е плод на заедничка акција на неколку полиции од регионот, координирани со Американската служба за спречување наркотици (ДЕА).

Надлежните укажуваат дека поголеми пратки шверцуван кокаин досега не се забележани низ земјава. Пратката која беше запленета на Блаце, најверојатно, била пробен балон за да се види како би функционирала оваа рута во иднина. Досега нашите служби многу ретко се занимавале со заплена на кокаин, бидејќи, поради високата цена, оваа дрога најчесто го заобиколувала македонскиот наркопазар. Кокаинот, поради својата ексклузивност, се нарекува и „дрога на богатите“.

Според одредени претпоставки, можно е запленетата дрога воопшто и да не потекнува од Венецуела, туку од Колумбија, која важи за најголем светски извозник на овој вид дрога. Дрогата потоа била пренесена во венецуелското пристаниште „Ла Гуара“, од каде што со хрватскиот брод „Лошињ“ на 14 ноември тргнала на пат долг два месеца, период во кој без проблеми минала низ неколку земји. Преку шпанското пристаниште „Алгесирас“ и италијанското „Џоја Тауро“, пред Нова година стигнала до Бар во Црна Гора. На 4 јануари годинава била претоварена во скопски шлепер, управуван од Алија Азировиќ од Чојлија, Скопско, кој со својата шефица Чочоровска се договорил за надомест од 1.100 евра да го пренесе товарот до Солун.