Свет
Под лупа имотот на Пановски, Стојовски, Димов и на Петровски
Никола Пановски, поранешниот директор на Фондот за здравство, бившиот директор на Гинекологија Марјан Стојовски, бившиот министер за здравство Владо Димов и поранешниот директор на Кардиологија Борче Петровски се четирите лица во бели мантили за кои Управата за јавни приходи се сомнева дека затајувале данок.
УЈП ЈА ТРЕСЕ БЕЛАТА МАФИЈА
Никола Пановски, поранешниот директор на Фондот за здравство, бившиот директор на Гинекологија Марјан Стојовски, бившиот министер за здравство Владо Димов и поранешниот директор на Кардиологија Борче Петровски се четирите лица во бели мантили за кои Управата за јавни приходи се сомнева дека затајувале данок. Во јавноста се вртат уште две имиња на поранешни директори на клиники чија имотна состојба е под лупата на УЈП.
Постапката за утврдување на потеклото на имотот на Пановски почнала завчера. УЈП го утврдува потеклото на парите на поранешниот директор на Фондот за здравство, како и неговиот несразмерно зголемен имот во однос на пополнетиот анкетен лист. Како што дознаваме, најалармантна била состојбата со потеклото на имотот на поранешниот министер за здравство Владо Димов. Тој, според досегашните сознанија на УЈП, не располагал со огромен имот во недвижнини, туку со акции, хартии од вредност и удели што биле префрлувани од една во друга фирма. Токму затоа, како што потврдуваат нашите извори, предметот за Димов е еден од најсложените и затоа на него најдолго се работи.
Во Управата подолго време работат на утврдувањето на потеклото на имотот на двајцата поранешни директори на Кардиологија и на Гинекологија Петровски и Стојовски. И двајцата демантираат дека биле на распит во УЈП и дека се стекнале со неоданочено богатство.
– Тоа се чисти шпекулации. Не сум бил на распит во УЈП. Анкетен лист немам пополнето бидејќи ние, како директори, требаше да пополниме анкетен лист, но потоа антикорупциската комисија се изјасни дека не треба бидејќи не спаѓаме во категоријата функционери – ни рече Стојовски.
Според законот за спречување на корупцијата, анкетни листови треба да пополнат само директорот на Клиничкиот центар и директорот на Фондот за здравство. Тоа значи дека за Петровски и Стојовски постапката се води според Законот за персонален данок на доход. Приврзаниците на нивниот табор велат дека станува збор за „хируршки прецизна селективност на управата“.
– Во целиот случај е препознатлива нишка на селективност. Едниот е опонент на Кедев, а другиот е претседател на комисијата за здравство. Зошто Управата почна токму од нив двајца? – велат нашите извори.
Никола Пановски, поранешниот директор на Фондот, вели дека редно време било УЈП да почне да си ја врши работата.
– Нека ја испитаат мојата имотна состојба, не ме интересира. На крајот на краиштата, редно време беше. Јас немам што да кријам. Анкетен лист пополнив еднаш додека бев заменик-министер, еднаш како директор на Фондот и еднаш на заминување. Освен тоа, двапати пријавив промена во имотната состојба – вели Пановски.
Тој вели дека имотниот лист му се состои од стан наследен од родителите, гарсониера од 30 квадратни метри, без имотен лист, автомобил „хонда сивик“ од 1996 година, три велосипеди, пет илјади евра на девизна сметка и еден милион денари на штедна книшка.
– Имотот, пак, на мојата сопруга се состои од 10 дуќани за оптика, 8 дуќани за накит, таа има 20 вработени и пријави данок на добивка од осум милиони денари. Сопругата има четири службени возила од 5.000 до 30.000 евра, како и деловен простор, а станот каде што живееме со води на име на фирмата – ни изјави Пановски.
Директорот на УЈП Горан Трајковски вчера не сакаше да ги потврди имињата на оние за кои се испитува потеклото на имотот.
– Постапката е завршена само за судијката Снежана Попчевска. За градоначалничката на Центар Виолета Аларова побаравме да и биде замрзнат имотот, исто како и за цариникот Момчило Георгиевски. Почнати се и постапки за некои од лицата во бели мантили. Денеска ќе имам подетални информации која постапка до каде е, бидејќи ќе ја добијам документацијата од работата на Управата во целата држава – ни изјави вчера Трајковски.
И да ги фатат, затајувачите нема каде да платат!
Стојмир Петров, директорот на ОЗТ Институти, единствениот за кого постои судска пресуда дека затајувал данок и дека на државата треба да и врати 100.000 евра, се уште не ги уплатил парите.
Во државава, како што велат упатените, не постои закон што предвидува кој треба да ги наплати парите од затајувачите, со оглед на тоа што извршителите можат да наплатат се, освен даноци. Така, додека државните институции не предвидат кој треба да го наплати данокот, УЈП работи во празно на утврдувањето на потеклото на имотот.
Според наодите на Управата, судијката Снежана Попчевска на државата треба да и врати 1,76 милион денари даночна обврска, градоначалничката на Центар Аларова – 6 милиони денари, а цариникот Георгиевски – 3 милиони денари. Дури и судот да донесе пресуда со која ќе им наложи на тројцата да ги уплатат парите, нема институција што може да ја изврши наплатата.
Ќе и се замрзне ли имотот на Аларова?
Од скопскиот Основен суд 1 вчера одбија да кажат дали и го замрзнале имотот на градоначалничката на Центар Виолета Аларова, откако завчера тоа го побара Управата за јавни приходи. По барањето за замрзнување на имотот судот решава итно, а неофицијално се дознава дека имотот на Аларова вчера бил замрзнат и таа не смее да го продава или отуѓува. Од УЈП велат дека вчера на Аларова и го врачиле решението со кое се врши задолжување со персонален данок на доход по основа на непријавени и неоданочени приходи со даночна стапка од 70 отсто.
– Уште при самото пополнување на анкетниот лист функционерот мора да го пополни и делот каде што треба да се наведе и имотот на членовите на семејството. Тоа е законска обврска – велат од Управата.
Аларова, пак, тврди дека УЈП неосновано ја товари за стан што го купил нејзиниот син со кого таа не живеела во иста заедница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Се истражува случајот со жената што донесе мртовец во банка за да подигне кредит, стинаа резултатите од обдукцијата
Бразилската полиција уапси жена осомничена дека донела во банка мртов маж, за којшто вели дека и е вујко, за да подигне кредит.
На социјалните мрежи се појави видео на кое се гледа како жена на шалтерот на банката Итау во Рио де Жанеиро ја крева главата на постар маж во инвалидска количка и се обидува да му стави пенкало во раката.
Од полицијата кажаа дека осомничената се обидувала да земе кредит во износ од 3.000 долари, кој банката веќе и’ го одобрила, но било потребно одобрение и од вујкото. Мажот од видеото не реагирал на барањата на жената. Додека се обидувала да му го даде пенкалото, неговата рака се спуштала, а главата му паѓала назад, пишува „Си-ен-ен“.
„Вујко слушаш, мораш да потпишеш. Ако не потпишеш нема шанси. Не можам да потпишам јас, мораш ти. Ајде не прави проблем, направи го тоа“, се слуша како му вели жената. Еден од вработените во банката во тој момент рекол дека постарата личност најверојатно не се чувствува добро.
Шефот на цивилната полиција во Рио де Жанеиро, Фабио Луис Соуза, изјави дека вработените во банката потоа решиле да повикаат брза помош. Кога пристигнале болничарите, утврдиле дека човекот бил мртов неколку часа. Полицијата води истрага и се обидува да утврди каква е точно поврзаноста на осомничената и загинатиот маж, а засега не е покренато обвинение.
Адвокатот на семејството го демантираше полицискиот извештај:
„Работите не испаднаа така. Човекот беше донесен жив во банка. Мојата клиентка е целосно потресена, зема лекови“, рече тој.
Обдукцијата откри нови детали
Бразилскиот медиум „Метрополес“ добил извештај од обдукцијата што укажува дека смртта на мажот била предизвикана од „бронхоаспирација и срцева слабост“. Утврдено е и дека бил неухранет.
„Таквите податоци ги потврдуваат некроскопските наоди за неухранетост и бронхоаспирација. Претходните срцеви заболувања исто така придонеле за смртта“, се вели во извештајот.
Судскиот совет ги чека резултатите од дополнителното испитување за да се утврди дали мажот бил отруен.
Бизнис инсајдер известува дека експертот кој ја потпишал прелиминарната форензичка анализа заклучил дека нема доволно докази за да се заклучи дали Пауло починал на пат кон или внатре во банката или починал пред тоа.
Меѓутоа, обдукцијата покажала дека згрутчувањето на крвта во неговиот врат сугерирало дека тој умрел легнат.
Адвокатот и натаму тврди дека неговата клиентка е невина, а нагласува и дека има сведоци. Истрагата продолжува.
Свет
ЕУ и Кина повикаа на воздржаност на Блискиот Исток
Кина објави дека се противи на каква било ескалација на тензиите на Блискиот Исток.
„Кина се противи на какви било активности што би можеле дополнително да ги ескалираат тензиите“, изјави денеска Лин Џијан, портпарол на кинеското Министерство за надворешни работи.
Реагираше и со претседатката на Европската комисија, Фон дер Лајен.
Таа ги повика Иран, Израел и нивните сојузници да се воздржат од ескалација на ситуацијата на Блискиот Исток.
„Апсолутно е неопходно регионот да остане стабилен и сите страни да се воздржат од понатамошни активности“, рече Урсула фон дер Лајен.
Претходно утрово, светските медиуми објавија дека Израел го нападнал Иран и дека се слушнале три експлозии во близина на воена база во централниот град Исфахан.
Сепак, засега нема официјални информации од двете држави за тоа што се случувало.
Свет
Разузнавачки извор за Си-ен-ен: Директните напади меѓу Израел и Иран завршија
Регионален разузнавачки извор рече дека директните напади меѓу Израел и Иран се завршени.
Изворот разговарал за Си-ен-ен под услов да остане анонимен околу два и пол часа по објавувањето на нападите. Изворот вели дека, според неговите сознанија, не се очекува Иран да одговори на нападот, но не наведе причина.
Претходно и висок ирански функционер изјави за „Ројтерс“ дека „Иран нема план за итна одмазда против Израел“.
Израел сѐ уште не потврдил дека го извршил нападот врз Иран, а тврдењата за нападот дојдоа од Вашингтон.
Од друга страна, од Иран доаѓаат контрадикторни информации, но нема официјален извештај.
Пред само еден час ирански аналитичар изјави за иранската државна телевизија дека „мини дроновите соборени од противвоздушната одбрана во Исфахан биле управувани од инфилтратори од Иран“.
Претходно, пак, ирански функционер изјави за „Ројтерс“ дека немало ракетен напад и дека експлозиите биле резултат на активирање на иранските системи за противвоздушна одбрана.