Дознаваме дека раководител на осигурителна компанија самоиницијативно му ги оставил парите на работната маса, како спонзорство за научен труд

Дознаваме дека раководител на осигурителна компанија самоиницијативно му ги оставил парите на работната маса, како спонзорство за научен труд

Директорот на Клиниката за пулмологија, д-р Дејан Докиќ, вчера беше приведен во полиција, наводно, поради поткуп од 300 евра.

Вработени од крим-полиција вчера околу пладне упаднале во кабинетот на д-р Докиќ и го затекнале кога ги примал парите од пациентот. 

Банкнотите биле обележени, а д-р Докиќ бил изнесен од главниот влез на клиниката околу 14 часот и однесен на распит во МВР.

Во полицијата велат дека долго работеле на случајот.

– Откако ни беа упатени најави, во МВР беа преземени посебни истражни мерки – од бележење банкноти до снимање телефонски разговори и се’ друго што е неопходно. Тоа го направивме во соработка со Јавното обвинителство, од кое добивме одобрение за мерките. Кај докторот се најдени 300 евра обележени пари. По акцијата за апсење корумпирани полицајци и цариници, сега се работи на расчистување на митото и корупцијата во здравството – велат во полицијата.

Директорот на Клиничкиот центар, Борче Георгиевски, вчера не сакаше да коментира за приведувањето на директорот на Пулмологија се’ додека не добие службено известување од полицијата.

Д-р Алексеј Дума, претседател на Лекарската комора на Македонија изјави:

– Ако се потврдат сомневањата на полицијата, ја поддржуваме Владата во борбата против корупцијата.

Вчера попладнето приведениот лекар требаше да даде изјава пред истражен судија.

Д-р Дејан Докиќ пред неколку месеци трет пат стана директор на Клиниката за пулмологија, а пред околу една година поднесе и кандидатура за академик во МАНУ.

Лани, германската фирма „Алергофарма“ му додели на Докиќ меѓународно признание за учество во наоѓање на вакцината „акароид“, која ќе биде спас за околу 10 отсто од нашето население, кое е алергично на домашната прав.

За пронаоѓањето на најновата вакцина, која е одобрена од Европската комисија за лекови и вакцини, д-р Докиќ работеше со проф. д-р Тони Фру од Универзитетот во Саутемптон, Велика Британија.

Последен пат д-р Докиќ во јавноста се појави на манифестацијата „Златна бубамара“, на која доби јавна благодарност од Тоше Проески затоа што успешно ја излечил неговата алергија пред настапот на Евросонг во 2004 година.

Најавено апсење

Новинари од еден весник на албански јазик уште вчера изутрината се јавувале на Клиниката за пулмологија и се интересирале „дали е уапсен директорот“. Извори од Клиниката велат дека првично биле изненадени од таквото прашање, но работата станала сомнителна кога по само неколку часа д-р Докиќ навистина бил приведен. Дознаваме дека поткупот, како што велат, бил наместен и испланиран од раководно лице на една осигурителна компанија, кој решил да го искомпромитира д-р Докиќ со тоа што на работната маса самоиницијативно му оставил 300 евра како спонзорство за научен труд.

(Р.Д.)