Мистериозната кражба на 300 килограми динамит и 1000 детонаторски каписли од магацинот на поранешното битолско претпријатие ,,Битоласил’’, за која МВР се уште молчи, им дојде како кец на десетка на вработените

ИСТРАГАТА ЗА ИСЧЕЗНАТИТЕ 300 КИЛА ЕКСПЛОЗИВ ОД БИТОЛСКА ФИРМА ОТКРИВА ДУПКИ ВО ПРИВАТИЗАЦИЈАТА

Мистериозната кражба на 300 килограми динамит и 1000 детонаторски каписли од магацинот на поранешното битолско претпријатие ,,Битоласил’’, за која МВР се уште молчи, им дојде како кец на десетка на вработените во ова, сега веќе приватизирано, претпријатие, бидејќи се надеваат дека полицијата конечно ќе го открие криминалот од големи размери во текот на приватизацијата на ова претпријатие. Битолската полиција не соопштува никакви детали се до целосното расветлување на случајот, но од наши извори дознаваме дека истрагата е проширена и на други пропусти и злоупотреби во работењето на “Битоласил”.

Неколкумина поранешни вработени во ова претпријатие отворено се сомневаат во регуларноста на ликвидацијата и приватизацијата на А.Д. Рудници и индустрија за неметали “Битоласил” и истакнуваат бројни незаконски постапки за време на стечајната постапка и по нејзиното завршување. Тие благовремено се обратиле и до Јавниот обвинител на Република Македонија и до Антикорупциската комисија, но од таму се уште ништо не е преземено. Тие обвинуваат дека на незаконски начин во сопственост на лицето Шефкија Идризи од тетовското село Џепчиште преминало земјиште и основни средства на фирмата кои се појавиле како основачки влог на новото друштво ,,Рено-сил’’.

“Се започна кон средината на јули 2003 година, кога госпоѓата Милица Николовска се појави во претпријатието, како законски застапник на госпоѓата Верка Максимовиќ, која од Агенцијата за приватизација го купила управувачкиот пакет државни акции од околу 72 отсто, и ни рече дека ќе биде новиот директор на А.Д. Битоласил. Бидејќи новиот сопственик живее во Канада, нејзиниот син Дејан Максимовиќ формира борд на директори, но во претпријатието буквално ништо не се работеше. Во ноември истата година половината од вработените без никаков надоместок беа прогласени за технолошки вишок”.

При крајот на декември истата година вработените биле повторно шокирани. “Дојде Милица Николовска и не извести дека доминантниот сопственик Верка Максимовиќ, која ќе патувала за Канада, на скопскиот аеродром, додека пиела кафе го продала управувачкиот пакет на извесен Шефки Идризи од село Џепчиште, сопственик на претпријатието ,,Ренова’’ и на неколку други фирми, кој бил подготвен да вложува во Битоласил, да ги задржи вработените и да отвори нови работни места. И се почна навидум добро, се до 20. април 2004 година, кога со решение на Основниот суд во Битола е отворена стечајна постапка, со која се согласи и доминантниот сопственик, што навистина е многу чудно, бидејќи со стечајот пропаѓа акционерскиот капитал”.

За време на стечајната постапка, велат ексвработените, се појавил нов доверител, лицето Бејтула Адеми од Голема Речица, кој од Агенцијата за санација ги откупил хипотеките на “Битоласил” и заостанатиот девизен долг, севкупно во висина од 42 милиони денари, за само 4 милиони денари, и со тоа станал најголем доверител. Во стечајната постапка и Шефки Идризи стана сопственик на основни средства, кои ги купил од тетовската фирма Интер-проект, што било прифатено од страна на стечајниот управник.

,,По ликвидирањето на ,,Битоласил’’, Шефки Идризи, Бејтула Адеми и Кенан Идризи регистрираа ново претпријатие АД Рено сил, во кое како основачки влог Бејтула Адеми ги вложува земјиштето и погоните за Кварц и Перлит, а Шефки Идризи ги вложува основните средства на ,,Битоласил’’ и земјиштето во демирхисаркото село Мренога. Стечајната маса не е дадена на лицитација, ниту пак ни е дозволен увид во проценката на капиталот, иако таа била направена и била утѕврдена на 400.000 евра. До денес не е одржана ниту една седница на одборот на доверители, а клучевите од сите простории на Битоласил се во рацете на претставникот на Ренова, во кои спаѓа и магацинот во кој се чуваше динамитот и детонаторските каписли”, истакнуваат неколкумина паранешни работници на поранешен ,,Битоласил’’ од Битола.

М.Павлевски