Во областа на Задар заразени се уште три лица, кои биле во контакт со заболен здравствен работник што пред пет дена бил на свадба со 300 гости.

„Заболената млада жена, која е здравствен работник, пред пет дена била на свадба во областа на Задар. Утрово не контактираа повеќе луѓе од таа венчавка. Опишаа симптоми карактеристични за инфекција со коронавирус. Ние ги тестиравме и сите тие се позитивни“, потврди за новинарите епидемиологот Алан Медиќ.

Со оглед на тоа дека на свадбата имало 300 луѓе, Медиќ очекува да има и други со слични симптоми во наредните денови.

„Апел до сите кои биле во близок контакт со заразените да се јават кај матичниот лекар или епидемиолошката служба со цел да се одреди мерка за самоизолација. Исто така, ги замолувам сите што биле на свадбата да се однесуваат одговорно во наредните денови”, рече Медиќ додавајќи дека досега сите откриени случаи се со благи симптоми.

Како што кажа епидемиологот, добра вест е дека заболените се претежно млади луѓе чија клиничка слика не е тешка, односно се карактеризира со главоболка или малку покачена температура. Сепак, ризично е тоа што овие млади луѓе се жариште на инфекција што може да ги загрози постарите и хронично болните.

Во моментов во самоизолација се 40 лица кои биле на свадбената прослава.

Српскиот министер за одбрана Александар Вулин вечерва во изјава за ТВ „Пинк“ рече дека она што се случува втора вечер по ред во Белград не е протест против мерките за борбата против коронавирусот, туку обид за пуч.

„Сите непријатели на Србија се среќни вечерва. Гледајќи го центарот на Белград, Нови Сад, како горат, како се напаѓа српската полиција, сограѓаните, како се уништува сè во оваа земја, на тоа среќни можат да бидат само непријателите на Србија“, рече Вулин во телефонско вклучувње.

„Од српските власти се бара да се повлечат настрана и да дозволат разни силеџии, фашисти и екстремисти да се обидат да ја преземат власта без избори“, додаде Вулин, повторувајќи дека собирите немаат никаква друга цел освен обиди за насилство и државен удар.

Тој порача дека настаните пред националното собрание не се ништо друго освен обид за разгорување на граѓанска војна.

„Српската држава ќе победи, државата мора да победи, ние ќе го зачуваме владеењето на правото бидејќи правната држава и силата на законот мора да го победат насилството“, заклучи Вулин.

Во последните 24 часа, во Црна Гора се регистрирани 53 нови случаи на инфекција со коронавирус од 392 спроведени тестирања.

Регистрирани се 35 нови случаи во Подгорица, шест во Цетиње, пет во Бјело Пољe, три во Бар, два во Будва и по еден во Плевља и Никшиќ.

„Во текот на денот пристигна еден извештај за сомнителна смрт која се поврзува со коронавирус. Во тек е лабораториска обработка. Вкупниот број потврдени смртни случаи од почетокот на јуни од Ковид-19 е осум. Вкупно се опоравиле петмина пациенти“, се вели во соопштението на Институтот за јавно здравје.

Од почетокот на јуни, вкупниот број на регистрирани случаи е 636, а бројот на активни 623.