Свет
ФБИ ќе го објави досието за Мајкл Џексон
Идната седмица пред јавноста треба да бидат објавени тајните документи кои за починатата поп икона ги класифицирало американското федерално истражно биро (FBI)
Идната седмица пред јавноста треба да бидат објавени тајните документи кои за починатата поп икона ги класифицирало американското федерално истражно биро (ФБИ)
Според пишувањата на американските медиуми, ова досие било правено во периодот од 1993 до 2004 г., и опфаќа материјали и докази за заканите и уценувањата на Мајкл Џексон.
Исто така, во него се содржани и информации, изјави и сведочења за аферите со злоставување на малолетни деца, од страна на пејачот. Првото обвинување датира од 1993 г., кога претставниците на Џексон се договориле со семејството на момчето, по што тој е ослободен од обвиненијата.
Второто обвинение е од 2004 г., по неговата изјава дадена во документарниот филм „Живеејќи со Мајкл Џексон“, кога вели дека често спие со момченцата во кревет. Џексон по две години повторно беше ослободен од сите обвиненија.
Во август 2009 г. блогер по име Мајкл Питрелс од Сан Франциско од ФБИ барал информации за Мајкл Џексон, а неколку дена подоцна добил писмо од Бирото во кое стоело дека може да го купи нивното досие за пејачот.
„Пронајдовме околу 591 страници кои одговараат на вашето барање. Првите сто страници нема да ви ги наплатиме, а ако ви ги испратиме сите страници тоа ќе ве чини 49 долари“, стоело во писмото потпишано од Дејвид Харди, началникот на секторот за информации и менаџмент на ФБИ.
Како што пренесуваат медиумите, освен за Џексон, Бирото ги набљудувало и Елвис Присли, Џим Морисон и Џери Гарсија, а книгата и филмот за Џон Ленон „Gimme some truth: The John Lenon FBI files“ се исто така резултат на тристотините страници информации собрани за британскиот пејач во периодот од 1971 и 1972 г. /крј/форум/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Си-Ен-Ен: Остин разговараше со Галант пред нападот на Иран, Вашингтон не ја поддржува оваа акција
Американскиот секретар за одбрана Лојд Остин разговараше во четвртокот со израелскиот министер за одбрана Јоав Галант за „регионалните закани и дестабилизирачките дејства на Иран на Блискиот Исток“, соопшти Пентагон.
Повикот бил упатен пред Израел, како што пренесуваат медиумите, да изврши напад внатре на територијата на Иран, а во соопштението на Пентагон не се споменува никаква дискусија за плановите на Израел за овој напад, пренесува Си-Ен-Ен.
Неименуван висок американски функционер изјави за Си-Ен-Ен дека Израел во четвртокот ја информирал Америка дека во наредните денови ќе возврати на нападот на Иран минатиот викенд и дека Вашингтон не ја поддржува оваа акција на Тел Авив.
Тензиите меѓу Тел Авив и Техеран се зголемија по нападот на Иран врз Израел на 13 април, со повеќе од 300 беспилотни летала и проектили. Неименуван американски функционер претходно за Си-Ен-Ен изјави дека Израел утринава извршил напад на иранска територија, а иранската државна телевизија објави дека три беспилотни летала биле забележани над небото во Исфахан и биле уништени откако системот за противвоздушна одбрана на земјата бил активиран.
Новинската агенција „Фарс“ објави дека се слушнале „експлозии“ во близина на меѓународниот аеродром во Исфахан. Провинцијата Исфахан е дом на голема воздухопловна база, голем комплекс за производство на ракети и неколку нуклеарни локации, наведува Би-Би-Си.
Израелската војска соопшти дека „засега нема коментар“ за извештаите за експлозии во Иран. Иранскиот министер за надворешни работи Хосеин Амирабдолахиан изјави неколку часа пред да се слушнат експлозиите дека доколку Израел преземе каква било воена акција, одговорот на Техеран ќе биде „веднаш и на максимално ниво“, пренесува Танјуг.
Свет
Трамп: Опстанокот на Украина е важен за САД
Доналд Трамп рече дека опстанокот на Украина е важен за Соединетите Американски Држави.
Поранешниот претседател поголемиот дел од својата објава на својата платформа „Truth Social“ го посвети на поплаките дека европските сојузници на САД не трошат доволно за поддршка на Украина. Некои десничарски републиканци ја протолкуваа најавата како сигнал дека тој се противи на сегашниот пакет помош, иако Трамп експлицитно не го кажа тоа.
Сепак, објавата се чини дека е едно од првите признанија на Трамп дека опстанокот на Украина е важен безбедносен интерес на САД, оценуваат тие. Минатата година, кога беше прашан за конфликтот во интервју за Си-Ен-Ен, Трамп одби да каже дали сака Украина да ја добие војната со Русија.
„Зошто Европа не може да даде иста сума пари колку што инвестираа САД за да и помогнат на земјата во очајна потреба“, напиша тој.
„Како што сите се согласуваат, опстанокот и силата на Украина треба да ѝ бидат многу поважни на Европа отколку на нас, но тоа е исто така важно за нас“, напиша тој.
Објавата на Трамп дојде еден ден откако ја пофали Полска, по средбата во кулата Трамп во Њујорк со полскиот претседател Анджеј Дуда. Поранешниот претседател и полскиот лидер разговараа за предлогот на Дуда членките на НАТО да трошат најмалку 3 отсто од својот бруто домашен производ за одбрана, изјави претставник на кампањата.
Во моментов од нив се бара да потрошат најмалку два отсто од БДП.
Републиканскиот претседател на Претставничкиот дом на САД, Мајк Џонсон, рече дека тие ќе гласаат за пакетот помош за Украина во сабота, и покрај жестоките приговори од десното крило на неговата пратеничка група.
Свет
(Видео) Светски медиуми: Израелски проектил го погоди Иран
Израел го нападна Иран, јавуваат светските медиуми.
Ројтерс цитираше изјава од три лица запознаени со ова прашање, додека иранските државни медиуми објавија рано денеска дека нивните сили ги уништиле беспилотните летала.
Ова се случува неколку дена откако Иран изврши одмазднички напад со дрон врз Израел. Извор изјави за Ројтерс дека САД не биле вклучени, но дека Израел ги информирал пред нападот.
Иранската новинска агенција „Фарс“ објави дека три експлозии се слушнале во близина на воена база во централниот град Исфахан.
Ирански функционер изјави за Ројтерс дека немало ракетен напад и дека експлозиите се резултат на активирање на иранските системи за противвоздушна одбрана.
Иранската државна телевизија објави дека нешто по полноќ „на небото над Исфахан биле забележани три дронови“.
„Системот за противвоздушна одбрана беше активиран и ги уништи овие дронови на небото“, пренесе медиумот.
Телевизијата подоцна соопшти дека ситуацијата во Исфахан е нормална и дека немало копнени експлозии.
Израелската армија не ги коментираше извештаите.
Си-Ен-Ен пишува дека Израел го извршил нападот внатре во Иран, а тоа го изјавил американски претставник за оваа мрежа.
Си-Ен-Ен тврди дека станува збор за потег кој се заканува со дополнително ескалирање на регионалниот конфликт.