Германскиот министер за здравство соопшти дека Германија издала пет милиони сертификати за вакцинација, кои се дизајнирани да бидат дел од системот на дигитални пропусници во цела Европска Унија.

Германија почна да издава сертификати кон крајот на минатата недела, потсетува агенцијата АП.

Аптеките во целата земја почнаа да им издаваат сертификати на лицата што се целосно вакцинирани и досега имаа само аналогни докази, а сертификатите може да се издадат и на самото место во големите центри за вакцинација.

Германските власти велат дека патниците на европските граници веќе ги користеле сертификатите без никаков проблем.

Досега 22,3 милиона луѓе во Германија се целосно вакцинирани, што е 26,8 проценти од вкупното население.

Англиско-шведскиот производител на лекови „Астра зенека“ објави дека нивната терапија со моноклонални антитела, AZD7442, не помага во превенција на болеста Ковид-19 кај лица што биле изложени на коронавирус.

Компанијата соопшти дека во студијата учествувале невакцинирани лица постари од 18 години, кои биле во контакт со заразените во последните осум дена.

Во споредба со плацебо, AZD7442 го намали ризикот од развој на симптоми на коронавирус за 33 проценти, што не е статистички значајно, соопшти компанијата.

Од „Астра зенека“ ја испитуваат ефикасноста на лекот кај веќе заразени пациенти и спречување на развој на потешки форми на болеста.

„Иако лекот не ја исполни примарната цел да спречи појава на симптоми, ние сме охрабрени од заштитата што им ја дава терапијата AZD7442 на учесниците со негативен ПЦР-тест“, рече Мене Пангалос, извршен потпретседател за истражување и развој во „Астра зенека“.

Владата на САД го поддржа развојот на AZD7442.

Компанијата постигна договор со Соединетите Американски Држави во март за испорака на половина милион дози од лекот, а во вторникот беше објавено дека во тек се преговори со американската влада за понатамошни чекори.

Ривалските компании „Регенерон фармацеутикалс“ и „Ели Лили и ко“ развија слични производи кои се состојат од моноклонални антитела и се одобрени за употреба во САД.

Терапијата со моноклонални антитела е класифицирана како група лекови што имитираат природни антитела што ги произведува телото за борба против инфекцијата.

Европската агенција за лекови (ЕМА) ја одобри терапијата со „регенерон“ и сега проучува слични лекови од производителите „Ели Лили“, „Целтрион“ и еден лек развиен од „Глаксо Смит Клајн“ и „Вир биотехнологија“.

Синоќа, во Модена се случил неуспешен обид за напад на блиндирано возило за да се ограбат парите и скапоцените предмети што ги превезувало, пренесува италијанската агенција „Анса“.

Разбојниците, како на филм, најпрвин го блокирале автопатот на јужниот излез од Модена, истуриле клинци на патот за да го оневозможат сообраќајот, запреле и под закана со оружје одзеле две возила, кои ги запалиле, а потоа запреле и два камиона и ги принудиле возачите да ги постават дијагонално како барикада на патот.

И покрај ваквите подготовки, нападот и грабежот не успеале, а како што соопшти полицијата, за среќа, нема жртви или повредени, иако очевидци велат дека слушнале експлозии и пукотници.

Чадот и пламенот од запалените возила биле видливи и километри подалеку од местото на инцидентот. Отпрвин постоел страв од посериозни последици, па во акцијата на полициските сили учествувал и медицински хеликоптер.

Разбојниците побегнале и по нив се трага.

Поради обидот за грабеж на автопатот меѓу Болоња и Модена, кој е важен сообраќаен центар, превозот бил блокиран неколку часа, а Италија била поделена на два дела. Утрово, како што пренесува агенцијата, сообраќајот на овој дел од автопатот се одвива нормално во двата правци.