Ердоган: Европејците секогаш наоѓале причина да нè остават пред вратата

Турскиот претседател Реџеп Таип Ердоган ја повика Европската Унија да се воздржи од потези и реторика што би можеле да го поткопаат она што тој го нарече „конструктивен став“ на Анкара. „Да не се заборави дека Турција повеќе не е стара Турција, ниту пак светот е сè уште ограничен на сферата на влијание на западните земји“, рече Ердоган во обраќањето до нацијата по седницата на владата.

Тој, исто така, рече дека ЕУ треба да препознае дека не може да биде глобален актер или привлечен центар без Турција како полноправна членка. Тој оцени дека „стратешката кратковидост“ на Унијата кон Турција „за жал сè уште јасно постои“ во многу европски институции.

„Прашањето не е каде стои Анкара, туку каде Брисел се гледа себеси во иднина“, вели Ердоган, додавајќи дека на Европа ѝ е потребна Турција повеќе отколку на Турција Европа.

„Утре, таа потреба ќе биде уште поголема“, додаде тој. Осврнувајќи се на процесот на пристапување во ЕУ, кој трае од 1959 година, Ердоган предупреди дека Унијата зазела пристрасен став кон кандидатурата на Турција. Тој рече дека односите се подобриле од 2015 година, делумно поради миграцискиот бран предизвикан од војната во Сирија, најголемиот во Европа по Втората светска војна.

Но, тој рече дека ЕУ не успеала да го одржи тој налет бидејќи доцнела, била недоволно ангажирана и не сакала да ѝ ја обезбеди потребната поддршка на Турција по обидот за државен удар на 15 јули 2016 година, во кој загинаа 253 лица. Тој рече дека последователните состаноци не дале охрабрувачки резултати што би го прекинале сегашниот ќорсокак или би дале нов импулс на односите Турција-ЕУ.

И покрај она што тој го нарече „многуте двојни стандарди со кои се соочи Турција“, Анкара ги продолжи своите напори за полноправно членство и одржува блиски контакти со институциите на ЕУ и земјите-членки.

Тој нагласи дека од првото аплицирање во 1959 година, длабоко вкоренетите предрасуди против Турција во некои европски кругови никогаш не биле надминати.

„Понекогаш ја напаѓаа нашата демократија, понекогаш ја гледаа нашата економија како закана, понекогаш ширеа страв за нашето население, а понекогаш ја користеа нашата религија како изговор за исклучување. Но, секој пат наоѓаа причина да ја држат Турција настрана, го забавуваа нејзиниот пат кон членство и ја оставаа пред врата“, се пожали Ердоган.

Тој додаде дека Турција се променила, трансформирала и зајакнала својата економија и демократија, но дека пристапот на овие кругови не се променил. За разлика од другите кандидати, Турција, рече тој, морала да се бори и против таков начин на размислување.

Повикувајќи се на зборовите на поранешниот претседател Тургут Озал дека Турција не само што поминала низ „долг и тесен пат“, туку и пат „полн со вештачки пречки“, Ердоган рече дека овој пат продолжува и денес.

„Ние не сме земја чие постоење се памети само кога е потребно, на чија врата се тропа само во вонредни ситуации, а во други времиња се турка настрана. Ние не сме и никогаш нема да бидеме таква земја“, рече тој.