„Приказната што треба да ја раскажете е за Украина 2.0“, вели Олександр Камишин, новиот стратешки советник на украинскиот претседател Зеленски, додека тој крева чаша за време на вечерата со ветераните и војниците. „Конечно, работите си доаѓаат на свое место“, додава тој во интервју за „Телеграф“.

Тој ја опишува својата работа како пожарникар. Секојдневно се среќава со претседателот Зеленски, кој го упатува да решава разни кризни прашања – од здравство и инфраструктура до производство на енергија и муниција. Со толку широк поглед на клучните сектори Камишин нуди визија за Украина по примирјето: земја што би можела да стане клучен дел од Европа со луѓе што се издржливи, технолошки напредни, вешти во развојот на дронови и одржување на железницата.

„Украина 2.0 носи лекции за одбранбената индустрија, здравството, службите за итни случаи и железничкиот систем“, вели Камишин. „Тоа не е сликата по која сакавме да бидеме познати, но научивме вредни лекции. Подготвени сме да го споделиме тоа знаење со светот“.

40-годишниот Камишин стана препознатливо лице за време на војната. Роден и израснат во Киев тој ја почна својата кариера во приватниот сектор работејќи во КПМГ и како менаџер за инвестиции пред да биде назначен за вршител на должноста директор на украинските железници во 2021 година.

По почетокот на инвазијата во 2022 година, „Укрзализница“ го доби прекарот Железна железница станувајќи извор на национална гордост и клучен елемент на логистиката. На безбедно превезувала бегалци и ранети, а во спротивна насока испраќала помош и опрема на фронтот. Во најкритичните моменти тие превезуваа по 190.000 луѓе дневно бесплатно, со воено организирана структура.

Во февруари 2023 година Камишин беше промовиран на позицијата министер за стратешки индустрии, со клучна задача да го зголеми домашното производство на муниција. Под негово водство Украина значително го зголеми производството на оружје и разви сопствен ракетен систем со долг дострел „Паљаница“, кој сега е во масовно производство.

„Тоа е вистински украински производ“, вели Камишин. „Еден ден тоа ќе им треба на Австралија, Велика Британија и на Јапонија. Затоа што, верувајте ми, Кина ќе тргне по Тајван, а Северна Кореја по Јужна Кореја. Наивно мислев дека Русите ќе се откажат. Сега знаеме подобро“.

На вечерата се собраа луѓе со слично убедување – енергични и иновативни, подготвени да ѝ помогнат на Европа да ги реши проблемите. Меѓу нив беше и Олександар Пертовски, новиот шеф на украинските железници, кој како и Камишин дојде од приватниот сектор, каде што работеше за ДХЛ во Сингапур. „Кога ќе завршиме со војната, ќе ви ги решиме проблемите со снегот на шините и лисјата на шините“, се пошегува тој.

Највпечатлива фигура на вечерта беше Серхиј Волински, 32-годишен војник и воен херој, чиј пиштол вметнат во појасот е единствениот знак на неговата професија. За време на опсадата на Мариупол во 2022 година тој водел 500 војници од челичарницата „Илич“ кон „Азовстал“, каде што дале очајнички отпор пред да се предадат. По четири месеци во заробеништво, тој беше разменет и прогласен за херој на Украина, што е највисока државна награда.

„Во Велика Британија немаат никој кој му е рамен“, вели Камишин. „Тој е воен талент, кој може да тренира војници во целиот свет“.

„Сите очекуваат дека САД ќе ја намалат нашата поддршка“, вели Камишин. „Но, Трамп сака договори. Мојот претседател исто така сака договори. Ќе најдат заеднички јазик“.

Сопругата на соборениот сириски лидер Башар ал Асад е санкционирана личност и „не е добредојдена овде во Британија“, изјави министерот за надворешни работи Дејвид Лами.

Коментарите на Лами доаѓаат откако премиерот рече дека е премногу рано да се каже дали владата ќе и го одземе британското државјанство на Асма ал Асад.

Таа е родена во Лондон во 1975 година и пораснала и се школувала во градот. Се верува дека Башар ал Асад сега е во Москва со сопругата, каде што побегнал. По брзиот колапс на режимот на Ал Асад, коалицијата на бунтовнички групи ја презеде контролата врз Дамаск во неделата.

Одговарајќи на прашања во долниот дом на парламентот во понеделникот вечерта, Лами рече: „Видов дека Асма Асад се споменува во изминатите неколку дена како некој со британско државјанство кој можеби се обидува да влезе во нашата земја и сакам да се потврди дека таа е санкционирана личност и таа не е добредојдена овде во Британија“.

Запрашан за можноста владата да и го одземе британското државјанство на Асма ал Асад, британскиот премиер Кир Стармер изјави за медиумите: „Ние сме уште далеку од да одлучиме што било. Во моментов сме во ситуација која брзо се менува и затоа е многу важно за нас да продолжиме да разговараме со нашите сојузници за да се увериме дека она што ќе се случи понатаму е мирно“.

Британскиот министер за меѓувладини прашања, Пат Мекфејден, претходно во понеделникот изјави за програмата „Тудеј“ на Би-би-си Радио 4 дека владата немала „никаков контакт или барање“ Асма ал-Асад да дојде во ОК.

Турскиот претседател Реџеп Таип Ердоган вчера изјави дека во светот останале само двајца лидери со долгогодишна служба и искуство во политиката – тој и неговиот руски колега Владимир Путин.

„Кога зборуваме за лидерите, во светот останаа само двајца, почитуваниот господин Путин и јас. Вашиот скромен слуга има 22 години претседателско искуство, а истото важи и за господин Путин“, рече Ердоган на средбата со младите луѓе, во турската провинција Газиантеп, која граничи со Сирија.

There are only 2 leaders left in the world – me and Vladimir Putin – Erdogan pic.twitter.com/uHshucuR6t

— Gyan Jara Hatke (@GyanJaraHatke) December 8, 2024

Тој посочи дека светот минува низ многу необичен период откако Доналд Трамп победи на претседателските избори во САД и оцени дека следните три месеци се многу важни, пренесува Анадолија.

Тој изјави дека Анкара ќе дејствува врз основа на таа претпоставка.

„Ќе видиме како ќе се формира новата администрација со Трамп. Во исто време, светот се развива во едно поинакво место. Поради оваа причина, следните два до три месеци се многу важни за нас. Ги вложуваме сите наши напори , давајќи се од себе и соодветно испраќајќи пораки до светот“, рече Ердоган.