Високорадиоактивен отпад ќе се складира во германските нуклеарни централи најмалку уште 50 години поради недоволниот број капацитети за трајно складирање, соопшти шефот на комисијата за отстранување нуклеарен отпад.

Постапката за складирање отпад во конечен склад ќе биде завршена околу 2080 година, а работниот век на привремените складишта истекува многу порано, предупреди Мајкл Сајлер во интервју за новинската агенција ДПА.

„Во Германија имаме 16 капацитети за привремено складирање високорадиоактивен отпад, а на повеќето од нив работната дозвола им истекува меѓу 2045 и 2046 година“, забележува Сајлер.

По откажувањето на планот за складирање на отпадот во купола во рудник во Горлебен, Долна Саксонија, германскиот парламент ја определи 2031 година како краен рок за наоѓање нова локација.

„Потоа следуваат процедури за издавање дозволи и градба, кои ќе траат дваесетина години, односно до средината на векот“, објаснува германскиот експерт.

Дури тогаш ќе почнат испитувања, додава тој.

Според процените, преносот на отпадот од привремено до конечно место за складирање може да трае и 30-ина години, забележува тој.

„Ова значи дека постапката за конечно складирање би траела од 2050 до 2080 година“, истакнува германскиот експерт.

Последната германска нуклеарна централа треба да биде затворена до крајот на следната година.

Романската група за стратешка комуникација во борбата против Ковид-19 објави дека на државно ниво денеска нема слободни кревети на интензивна нега (ИЦУ) за лица со коронавирус.

Се додава дека останале само неколку кревети кои се зачувани за пациенти кои имаат посебна медицинска состојба, а им е потврден и САРС-Ков-2, пренесуваат агенциите.

Во Романија, денеска во болниците низ земјата се зафатени 1.624 кревети за интензивна нега.

Исто така, на национално ниво, има уште 187 легла за пациенти на ИКТ, кои служат како резерва и понекогаш се активираат кога бројот на пациенти го надминува капацитетот.

Русија ќе ја прекине воената мисија за врски на НАТО во Москва и ќе ја укине акредитацијата на нејзиниот персонал како одговор на одлуката на алијансата да ја повлече акредитацијата на осум руски дипломати, изјави рускиот министер за надворешни работи Сергеј Лавров на прес-конференција.

„Како одговор на акциите на НАТО, ги прекинуваме активностите на мисијата за воена врска на НАТО во Москва и ќе ја укинеме акредитацијата на нејзиниот персонал од 1 ноември оваа година“, рече високиот руски дипломат.

Исто така, работата на информативната канцеларија на НАТО во Москва, која беше формирана во амбасадата на Кралството Белгија, ќе биде прекината, рече Лавров.

„Ако НАТО има итни прашања, може да се обрати до нашиот амбасадор во Белгија за тие прашања“, додаде рускиот министер за надворешни работи.

На 6 октомври, НАТО објави дека го намалила персоналот на руската мисија во алијансата од 20 на 10 членови, укинувајќи ја акредитацијата на осум дипломати и укинувајќи две слободни места. Северноатлантската алијанса им нареди на руските дипломати да го напуштат Брисел до крајот на октомври.