Данска размислува да ја дистрибуира вакцината на „Астра зенека“ на посиромашните земји откако престана да ја користи во земјата поради загриженост за формирање на ретки крвни згрутчувања, изјави директорот на СЗО за Европа.

Данска стана првата земја што го прекина користењето на вакцината „Астра зенека“ оваа недела, додека европските официјални лица продолжуваат да анализираат десетици извештаи за многу ретки згрутчување на крвта во комбинација со ниски тромбоцити што се појавија во земјите на Унијата, како и во Велика Британија.

Светската здравствена организација (СЗО), која заедно со британските и европските медицински агенции продолжуваат да ја препорачуваат употребата на вакцината, велејќи дека придобивките од вакцината ги надминуваат ризиците, исто така, врши притисок врз земјите да не складираат вакцини доколку не ги користат.

„Вчера разговарав со Сорен Бростром, директор на данското здравствено тело и сфатив дека данското Министерство за надворешни работи е подготвено или веќе разгледува опции за споделување на вакцината на „Астра зенека“ на посиромашните земји“, изјави директорот на СЗО за Европа, Ханс Клуге, пред новинарите.

Европската комисија соопшти дека работи на предлог што ќе ги промени сегашните препораки за забрана на несуштинско патување на граѓаните од Западен Балкан во ЕУ.

Брисел потсетува дека со цел да се потисне пандемијата и ширењето на новите видови на вирусот, во моментов на сила се ограничувања, кои се однесуваат на неважни патувања во ЕУ и кои се однесуваат и на земјите од Западен Балкан.

„Работиме на промена на овие препораки. ЕК работи на нов предлог за промена на состојбата за патниците од Западен Балкан“, изјави портпаролот на ЕК, Адалбер Јанц.

Јанц нагласува дека на овој предлог се работи паралелно со веќе презентираниот предлог за издавање дигитални т.н. зелени сертификати, како за граѓаните на ЕУ, така и за државјани на трети земји кои легално престојуваат во ЕУ.

„Во моментов, дигиталните сертификати (планирани за на лето) не го менуваат фактот дека ограничувањата за неважни патувања се и натаму на сила во ЕУ“, нагласи Јанц.

Според информациите на германскиот дневен весник „Велт“, политичарката на Христијанско-демократската унија (ЦДУ) ќе биде имунизирана со вакцината на „Астра зенека“ со цел да се зголеми довербата во оксфордската вакцина во целата Европска Унија.

Канцеларката Меркел има повеќе од 60 години и со тоа спаѓа во групата на оние што ги исполнуваат условите за вакцинација со вакцината на „Астра зенека“ во Германија.

Претходно, Ангела Меркел, која има 66 години, изјави дека нема да се вакцинира со вакцината на „Астра зенека“ и „Оксфорд“ бидејќи таа не влегува во групата на луѓе за кои се препорачува таа вакцина.