Досега 170 милиони луѓе се вакцинирани против Ковид-19 во ЕУ, но само 30 милиони ги добиле потребните две дози. Ова го соопшти еврокомесарката за здравство, Стела Киријакидис, пред европратениците од Комитетот за животна средина, јавно здравје и безбедност на храната.

Таа изрази надеж дека набргу на ден ќе бидат вакцинирани по три милиони луѓе во ЕУ. Производството на вакцини во Унијата се зголемува и затоа ќе биде можно „Фајзер“ да испорача дополнителни 50 милиони дози порано, додаде комесарката.

Киријакидис рече дека се водат преговори за снабдување на 1,8 милијарда дози вакцини до 2023 година. На почетокот на овој месец ЕК објави дека ќе се фокусира на идните договори за снабдување со докажани технологии засновани на месенџер-РНК. Од производите одобрени од ЕУ ваквите вакцини се произведуваат само од „Фајзер“ и „Модерна“.

Тројца вработени во руската амбасада во Братислава треба да ја напуштат Словачка во рок од една недела.

„Во согласност со моментната геополитичка состојба, како и ситуацијата во Чешка, тројца вработени во руската амбасада во Братислава мора да ја напуштат територијата на Словачка во рок од седум дена“, изјави словачкиот премиер, Едуард Хегер.

Москва изрази разочараност од одлуката на Братислава навестувајќи дека бргу ќе одговори на ситуацијата.

Прага претходно протера 18 вработени во руската амбасада поради наводна улога на Русија во експлозија во магацин со оружје во 2014 година, во која загинаа две лица. Москва одговори со враќање на 20 чешки дипломати.

Европската комисија нема да купува 100 милиони дополнителни вакцини против Ковид-19 на „Астра зенека“, како што претходно беше договорено.

Портпаролот на ЕК на прес-конференција рече дека рокот за спроведување на оваа опција е веќе истечен и ЕУ не планира да ја спроведе.

Комисијата нарача 300 милиони дози од вакцината на „Астра зенека“ во рамките на договорот кој предвидува 400 милиони дози, од кои набавката на 100 милиони не е задолжителна.

Европската Унија сè уште не одлучила дали ќе преземе правни мерки против „Астра зенека“ бидејќи не ги испорача договорените количини од вакцината против Ковид-19, изјави портпаролот на Европската комисија. Бриселскиот портал „Политико“ објави дека ЕК се подготвува да поднесе тужба против „Астра зенека“ повикувајќи се на пет неименувани дипломати на ЕУ.