Британската полиција соопшти дека убиството врз пратеникот на Конзервативната партија, Дејвид Ејмс е терористички чин.

Првите наоди од истрагата укажуваат на потенцијална мотивација поврзана со исламистички екстремизам.

Ејмс беше убиен со нож додека разговараше со жителите во неговата изборна единица во Есекс.

25-годишник е уапсен на лице место под сомнение дека го извршил убиството, а полицијата соопшти дека не трага по други сторители. Извори од британската влада за Би-Би-Си велат дека уапсениот е со британска националност, но со сомалиско потекло.

Кој беше сер Дејвид Емс?

Тој ги претставуваше ториевците во парламентот речиси 40 години.

69-годишниот политичар, кој во приватниот живот е татко на пет деца првпат влезе во парламентот во 1983 година.

Тој беше израснат во католички дух и беше познат како социјален конзервативец, гласно се бореше против правото на абортус и активно се вклучи во заштитата на благосостојбата на животните.

ЕУ треба да ги реши разликите преку меѓусебни разговори, рече германската канцеларка Ангела Меркел, одговарајќи на прашањето за спорот со Полска околу владеењето на правото.

„Сите ние сме земји -членки на Европската унија, што значи дека имаме должност секогаш да се обидуваме да најдеме компромис без да се откажеме од нашите принципи“, им рече Меркел на новинарите по средбата со белгискиот премиер Александар Де Крум во Брисел, пренесе „Ројтерс“.

„Мислам дека е време подетално да разговараме со полската влада за тоа како да се надминат проблемите“, додаде таа.

Меркел посочи дека Европскиот суд на правдата мора одвреме -навреме да одлучува за предметите, но исто така додаде дека е загрижена за бројот на предмети што завршуваат пред највисокиот суд на ЕУ во моментов.

Од идната недела данските здравствени власти ќе почнат да канат голем број граѓани да примат трета доза од вакцината против Ковид-19, изјави денеска министерот за здравство, Магнус Хојнике.

Повик ќе добијат лицата што ја примиле втората доза пред шест и пол месеци, а првично ќе бидат повикани оние над 65 години, здравствените работници и постари работници, кои биле меѓу првите што примиле вакцина против Ковид-19, објанси министерот.

Регулаторното тело за лекови на Европската Унија соопшти дека оние со ослабен имунолошки систем како трета доза треба да добијат вакцина од „Фајзер-Бионтек“ или „Модерна“, но остави на земјите членки да одлучат дали пошироката јавност треба да добие дополнителна доза.

Во септември Данска почна да дава трета доза за згрижените во домовите за стари лица и за другите изложени на ризик од сериозни болести предизвикани од вирусот.

Нордиската земја ги укина последните ограничувања за коронавирусот во септември откога вакцинира голем дел од населението.

Досега, 75 проценти од населението е вакцинирано, а 2,2 процента од Данците добиле трета бустер-доза.