Рекордни 83 отсто од Украинците сакаат нивната земја да се приклучи на НАТО-алијансата, објави денеска киевската Агенција за испитување на јавното мислење, повикувајќи се на резултатите од истражувањето спроведено откако Киев поднесе барање за членство во воениот блок.

Агенцијата „Рејтинг груп“ спроведе истражување на примерок од 2.000 испитаници на 1 и 2 октомври, откако украинскиот претседател Володимир Зеленски во петокот објави дека Украина поднесува забрзана апликација за членство во НАТО.

Ова е највисокиот регистриран процент на луѓе во Украина кои го поддржуваат членството во НАТО, соопшти „Рејтинг груп“.

Само четири отсто од испитаниците рекле дека би гласале против влезот во блокот, а девет отсто рекле дека воопшто нема да гласаат.

Во ноември минатата година 55 отсто од испитаниците го поддржаа приклучувањето кон алијансата, што покажува колку се промени јавното мислење откако Русија ја започна инвазијата на Украина.

Со години Русија се спротивставува на проширувањето на НАТО, кое го смета за безбедносна закана.

Шефот на нуклеарната централа Запорожје во Украина, кој во петокот беше приведен и уапсен од руски патроли е ослободен, објави денеска шефот на нуклеарната агенција на ОН, МААЕ – Рафаел Гроси. Украина ја обвини Русија за неговото апсење и истото го нарече терористички чин.

Украина извести дека руска патрола го уапсила Ихор Мурашов во петокот додека патувал од најголемата европска нуклеарна централа до градот Енерходар, дом на многу вработени во централата.

Објектот сè уште е управуван од украински персонал под услови за кои Меѓународната агенција за атомска енергија (МААЕ) вели дека ја загрозуваат неговата безбедност.

Агенцијата во саботата објави дека контактирала со „релевантни лица од властите“, без конкретно да ја спомене Русија и дека била информирана дека Мурашов е „привремено приведен“.

„Ја поздравувам веста за ослободувањето на Ихор Мурашов, директорот на нуклеарната централа Запорожје во Украина. Добив потврда дека господинот Мурашов се вратил кај своето семејство и е безбеден“, напиша денеска Гроси.

Русија и Украина се обвинуваат меѓусебно за гранатирањето кое ги оштети зградите околу централата, а МААЕ повика на тампон зона околу локацијата за да се намали ризикот од потенцијална катастрофална несреќа. Гроси оваа недела треба да отпатува за Москва и Киев каде ќе учествува во преговорите, пренесува Индекс.хр.

Украинските сили го постигнаа најголемиот успех на југот на земјата од почетокот на војната со пробивање на линијата на фронтот и забрзано напредуваат по реката Днепар, заканувајќи се дека ќе опколат илјадници руски војници, пренесува „Ројтерс“.

Киев официјално не го потврди ова, но руски извори признаа дека украинската тенковска офанзива напредувала десетици километри по должина на западниот брег на реката и дека на тој пат биле освоени голем број села.

Ова ги одразува неодамнешните големи успеси на Украина на истокот на земјата, кои ја свртеа војната, иако Москва го зголеми интересот со анектирање на освоените територии, прогласување делумна мобилизација и закана со нуклеарна одмазда.

„Информациите се напнати, ајде да се изразиме така, бидејќи, да, навистина имаше пробив“ – изјави за руската државна телевизија, Владимир Салдо, проруски функционер во окупираната област Херсон.

„Има населба Дудчани, веднаш до реките Днепар и таму, во тој крај, дојде до пробив. Има населби кои беа заземени од украинските сили“ – рече тој.

Дудчани се наоѓа на околу 40 километри јужно од местото каде што пред само еден ден беше линијата на фронтот, што укажува дека ова е едно од најбрзите напредувања на украинските сили досега и убедливо најбрзото на југот на земјата, каде што руските сили беа во силно утврдени позиции, а линијата на фронтот беше главно статична уште од првите недели од инвазијата.

Киев речиси целосно молчи за ова, како што беше и во претходните големи офанзиви, иако некои официјални лица споменаа непотврдени извештаи за напредување на украинските сили.