Директорот на Агенцијата за здравје и безбедност на храна (АГЕС), Франц Алербергер, оцени дека 30 проценти од населението во Австрија биле заразени со коронавирус.

Постојат различни процени за заразеноста на граѓаните, пред се за прашањето колку Австријци имале асимптоматска инфекција. Тековните податоци за тоа колку Австријци контактирале со коронавирусот се движат од седум до 30 проценти.

Алербергер го заснова своето тврдење дека стапката на инфекција достигна 30 проценти врз основа на податоците од студијата спроведена во Ишгл, каде што беше главното жариште пред една година.

Алербергер истакнува дека според податоците од студијата може да се заклучи дека досега биле заразени нешто повеќе од три милиони Австријци.

За споредба, досега, според податоците на АГЕС, околу 450.000 луѓе биле позитивно тестирани на коронавирусот.

Научник од Техничкиот универзитет во Виена кој се занимава со симулации, Ники Попер, на крајот на минатата недела ги презентираше податоците дека околу 15 проценти од Австријците биле заразени, што е помеѓу 1,3 и 1,5 милион луѓе.

Овие податоци се многу важни за австриските власти во постигнувањето колективен имунитет.

Според експертите, потребно е најмалку 50 до 60 проценти од населението да има имунитет за да се постигне целта која би овозможила нормален живот.

Вакцинацијата во Австрија се спроведува многу бавно, побавно од планираното, поради проблеми во испораките на фармацевтските компании.

Царините во Германија и Белгија заплениле рекордни 23 тони кокаин наменети за трговија во Холандија, пренесува Би-би-си.

Германските власти откриле 16 тони во пет транспортни контејнери што претходно месецов пристигнале во пристаништето во Хамбург од Парагвај. Веднаш била известена полицијата во Холандија, а во белгиското пристаниште Антверпен биле запленети уште 7,2 тони кокаин.

Германските власти соопштија дека уличната вредност на кокаинот се проценува на милијарди евра.

Во Антверпен, дрогата билa скриенa во контејнер исполнет со дрвени блокови од Панама.

Кокаинот пронајден во Хамбург бил скриен во конзерви кои содржеле гипс што се користи за пополнување на пукнатини во ѕидови.

Уапсен е 28-годишен маж осомничен за вмешаност во трговијата со рекордната количина кокаин, соопшти холандската полиција. Според извештаите на медиумите, станува збор за холандскиот државјанин Атиф С.

Европол денеска објави дека 38 лица се уапсени во Франција, Романија и Молдавија под сомнение дека се членови на криминална организација што шверцувала и експлоатирала работници мигранти, пренесува „Ројтерс“.

Во разбивањето на оваа организирана криминална група учествуваа полицајци, кои се обвинети за криумчарење мигранти, трговија со луѓе заради трудова експлоатација, измама со документи, социјални бенефиции и перење пари, се вели во соопштението на Европол.