Стотици дози од вакцината на „Астра зенека“ против Ковид-19 се фрлаат секој ден во Стокхолм затоа што жителите одбиваат да се вакцинираат со неа, изјави денеска шведски лекар за телевизијата СВТ.

Јохан Стируд од Медицинското здружение на шведската престолнина рече дека нема доволно доброволци за „Аастра зенека“, па затоа вакцините мора да се фрлат доколку не се искористат за неколку часа.

Во Шведска давањето на вакцината од британско-шведскиот производител е ограничена на лица над 65 години откога во светот беа пријавени ретки случаи на згрутчување на крвта како несакан ефект по примањето.

СВТ известува дека некои пациенти ги откажуваат закажаните термини кога ќе дознаат дека ќе примат вакцина од „Астра зенека“.

Стируд, како и Европската агенција за лекови (ЕМА) и Светската здравствена организација (СЗО), нагласува дека придобивките од оваа вакцина се многу поголеми од ризиците, па ги повика луѓето да се вакцинираат.

Отфрлање на вакцината oд „Астра зенека“ е забележано и во Хрватска, која во моментот има најголем број дози токму од оваа вакцина, објавија хрватските медиуми, кои ја пренесуваат изјавата од шведскиот доктор.

Шведската активистка за климата, Грета Тунберг (18), најави дека ќе донира 100.000 евра за поправедна дистрибуција на вакцините против Ковид-19.

Средствата се наменети за механизмот „Ковакс“ на Светската здравствена организација (СЗО) за обезбедување еднаков пристап до вакцините против Ковид-19 за земјите во развој, рече Тунберг на прес-конференција со шефот на СЗО, Тедрос Гебрејсус.

„Меѓународната заедница мора да стори повеќе за да се реши трагедијата со нееднаква дистрибуција на вакцини (…) зашто, како во случајот со климатската криза и тука првин мора да им помогнеме на најранливите“, рече шведската активистка.

Според СЗО, во многу богати земји едно од четири лица ја примило првата доза осд вакцината против Ковид-19, а во посиромашните земји едно од 500 лица.

Властите во Прага бараат руската амбасада во Чешка да го напушти просторот што моментно го зафаќа на површина од пет илјади квадратни метри, кој пред 1968 годинина бил дел од паркот „Стромовка“, изјави шефот на овој прашки округ, Јан Чизински.

„Градскиот совет на Прага ја повика републичката влада да почне преговори за просторот што моментно го окупира руската амбасада за тој да ѝ биде вратен на државата како што беше пред инвазијата на силите на Варшавскиот пакт во 1968 година“, објави Чизниски на својот профил на „Твитер“.

Чешките медиуми објавија дека градските власти планираат да засадат дрвја и цвеќиња во таа област и да ја претворат во парк, како што на таа локација било пред август 1968 година.

Чешка денеска ја напуштија 18 вработени во руската амбасада, кои тамошните власти ги прогласија за персона нон грата, изјави портпаролката на руската дипломатска мисија, Марија Семјонова.

„Осумнаесет вработени во руската амбасада и членови на нивните семејства ја напуштија територијата на Чешка“, изјави Семијонова за агенцијата ТАСС.

Чешки официјални лица тврдат дека овие 18 руски дипломати се членови на руските разузнавачки служби.

Во исто време официјална Прага ги обвинува руските тајни служби за вмешаност во подметнатата експлозија во складиште за муниција во Врбетице во 2014 година, при што загинаа две лица.

Како одговор на ваквиот потег Русија протера 20 вработени во амбасадата на Чешка во Москва.