Долниот дом на чешкиот парламент денеска изгласа мерка за даночење на исплатата што црквата ја добива како надомест за имотот запленет за време на комунистичкиот режим, што беше клучно барање на актуелната Чешка комунистичка партија (KSČM) за поддршка на малцинската влада од левиот центар.

Претставниците на владејачката партија АНО, премиерот Андреј Бабиш и нивните малцински партнери им се придружија на комунистите, па предлог-законот помина со 106 гласа. Долниот дом има 200 претставници.

Отштетата на црквите, во најчест случај католички, почна да се исплаќа во 2013 година и изнесува две милијарди круни (75 милиони евра) годишно за период од 30 години.

Тие е надомест за црковниот имот што комунистичките власти го конфискувале по Втората светска војна, а сегашната власт не е во можност да го врати со Законот за денационализацијата бидејќи во меѓувреме настанала смена на сопствениците.

Законот мора да го потврди и чешкиот Сенат, а некои претставници веќе најавија дека ќе бараат ревизија на уставноста.

Црковните власти, чие влијание во чешкото општеството е сѐ помало, се соочуваат и со постепено намалување на владиниот придонес за платите на свештениците и другите трошоци на црквата.

Рускиот претседател, Владимир Путин, смета дека подобрувањето на руско-турските односи е лично постигнување на неговиот турски колега, Реџеп Таип Ердоган, кој, како што рече, вложува голем напор и енергија за односите да бидат на високо ниво.

Путин за време на денешните разговори со турскиот претседател изјави и дека нивните, сега веќе редовни состаноци, даваат позитивни резултати во односите меѓу двете земји, пренесе агенцијата „Тасс“.

Тој наведе и конкретни податоци кои покажуваат дека трговската размена меѓу Турција и Русија за 10 месеци во 2018 година ја надминала вкупната размена од 2017 година.

Путин истакна и дека бројот на руски туристи што ја посетиле Турција минатата година се зголемил 30 проценти и достигнал шест милиони, што, според него, е добар показател дека граѓаните на двете земји гледаат позитивни промени во билатералните односи.

Рускиот претседател додаде дека двете држави продолжуваат со спроведување на главните билатерални проекти, интензивно соработуваат во однос на регионалните безбедносни прашања и активно бараат решение за кризата во Сирија.

Портпаролот на женевската полиција, Силвен Гијо-Жентиј, потврди дека во близина на зградата на конзулатот на САД во овој швајцарски град, денеска одекнала експлозија и додаде дека инцидентот настанал поради електрични инсталации и течност за ладење.

Гијо-Жентиј посочил дека експлозијата се случила во подземната градска инфраструктура, без да открие други детали, нагласувајќи дека никој не бил повреден.

Американската амбасада во Швајцарија претходно издаде безбедносно предупредување по извештаите за експлозија во близина на американскиот конзулат во Женева.

„Се појавија извештаи за експлозија во областа околу конзуларната агенција. Избегнувајте ја оваа област и барајте засолниште во близина. Постапувајте по советите на безбедносниот персонал“, се вели во пораката од американската амбасада во Берн.