Европа
Асанж бара излегување на слобода една година по одлуката на ОН
Основачот на разобличувачкиот интернет ресурс WikiLeaks, Австралиецот Џулијан Асанаж ги повика Велика Британија и Шведска во понеделникот да ја спроведат одлуката на комитетот на Обединетите нации кој пред една година оцени дека неговото притворање е акт на самоволие.
„Ги повикувам Велика Британија и Шведска да постапат праведно и да ме ослободат. Овие две земји се потписници на договорот со кој ги признаваат ОН и нејзините механизми за заштита на човековите права“, истакна Џулијан Асанж во писмената изјава.
Работната група на ОН составена од правни експерти на 5-ти февруари 2016 година повика да „Биде прекинат неговиот притвор кој е чин на самоволие“, што Велика Британија и Шведска го одбија.
Сега 45-годишниот Австралиец Џулијан Асанж од јуни 2012 година се засолна во амбасадата на Еквадор во Лондон, за да не биде екстрадиран во Шведска каде што е обвинет за наводни случаи на сексуално злоставување – секс без кондом, и на силување.
Асанж ги негира обвинувањата за коишто по изјавите на две жени шведските власти го обвинија во август 2010 година, но досега не подигнаа обвинение против него поради тоа што не беше сослушан. Но на 15-ти ноември 2016 година, два дена беше сослушуван во амбасадата на Еквадор во Лондон. Сослушувањето го водеше еквадорскиот државен обвинител во присуство на шведската колешка Ингрид Инсгрен, заменичка на судијата иследник, но без присуство на шведскиот адвокат на осомничениот.
Шведските обвинители во 2015 година се откажаа од истрагата за сексуален напад, бидејќи по пет години ова дело застарува. Меѓутоа, и натаму имаат намера да го испитаат поради обвинувањата за силување, за што застарувањето настапува по десет години.
Како осомничен Асанж беше уапсен во Лондон на 7-ми декември 2010 година по барање на шведските правосудни органи, кои инсистираат на негова екстрадиција. Сепак, по неколку дена тој беше ослободен со кауција.
Избегнувајќи ја можноста повторно да биде уапсен од британските власти и да биде предаден во Шведска, Асанж во 2012 година влезе во амбасадата на Еквадор во Лондон каде што бараше политички азил поради стравувањата дека шведските власти ќе во предадат на САД поради тоа што на WikiLeaks објави повеќе од 500.000 тајни воени досиеја за војните во Ирак и во Авганистан, како и непријатната тајна преписка на американската дипломатија.
Основачот на WikiLeaks кон средината на на јануари годинава изјави дека е расположен да им се предаден на САД, каде што му се закануваат тешки обвиненија, меѓу другото и за шпионажа, доколку му бидат гарантирани човековите права./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Германија уапси две лица: соработувале со Русите, планирале да ја саботираат армијата
Две лица, кои, освен германско, имаат и руско државјанство, се уапсени во Германија поради наводно планирање саботирање воени објекти, вклучително и американски, со цел да ја поткопаат воената поддршка за Украина, соопшти денеска германското Обвинителство. Властите извршија претрес во домовите и работните места на двајцата осомничени, кои се обвинети дека работеле за странска тајна служба, се наведува во соопштението на Обвинителството.
Еден од осомничените, идентификуван како Дитер С., разговарал за можни заговори со лице поврзано со руската тајна служба од октомври 2023 година, се посочува во соопштението.
Дитер С. подготвувал бомбашки напади и палење во воени објекти, вклучително и оние со кои управуваат американските сили, се додава во соопштението.
Според магазинот „Шпигел“, еден од објектите е воената база „Графенвоер“, во јужната сојузна држава Баварија, каде што украинските војници се обучуваат да управуваат со американските тенкови „Абрамс“. Руската амбасада во Берлин не одговори веднаш на барањето за коментар.
„Намерата на акциите беше да се поткопа воената поддршка што Германија и ја дава на Украина против руската воена агресија“, се вели во соопштението на германските обвинители.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.