Европа
(Видео) Пешачејќи десетици, па и илјадници километри, климатските активисти пристигнаа во Глазгов
Стотици активисти, поборници за климата, дојдоа во Глазгов за да извршат притисок врз светските лидери да дејствуваат за заштита на климата еден ден пред Самитот за климата, состанок клучен за иднината на планетата.
Многумина од нив пристигнаа пешачејќи десетици, па дури и илјадници километри, означувајќи го почетокот на митинзите кои се одржуваат истовремено со климатската конференција на ОН, која завршува на 12 ноември во тој шкотски град.
Синоќа, младата шведска активистка Грета Тунберг пристигна со воз во Глазгов, откако еден ден претходно присуствуваше на митингот на млади еколошки активисти во Лондон против улогата на финансиските институции во климатската криза.
Демонстрантите, кои пристигнаа од Шпанија, Белгија и самата Шкотска, претходно маршираа низ центарот на градот носејќи транспаренти со слогани „Ајде да дејствуваме сега“, „Акции, а не зборови“ и „Стоп за фосилната енергија“.
На самитот треба да присуствуваат повеќе од сто лидери, меѓу кои и Американецот Џо Бајден и францускиот претседател Емануел Макрон.
Се очекува да пристигнат и илјадници климатски активисти од целиот свет. Организаторите проценуваат дека ќе има околу 100.000 на големиот собир закажан за петок.
Шкотската полиција соопшти дека околу 10.000 полицајци ќе бидат распоредени на улиците на Глазгов секој ден за време на Самитот, и тоа ќе биде најголема операција за спроведување на законот досега организирана во Шкотска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.