Европа
Вилдерс ветува „чистење“ на Холандија од „мароканското ѓубре“
Политичарот од крајно десниот холандски политички спектар, Геерт Вилдерс, ја започна во саботата предизборната кампања ветувајќи дека ќе го исчисти „мароканското ѓубре“ поради коешто холандските улици не се сигурни и ги повика сонародниците „да си ја повратат“ својата земја гласајќи за неговата евроскептична и антимуслиманска Слободарска партија.
Геерт Вилдерс се надева дека на ваквата платформа ќе победи на парламентарните избори на 15-ти март. Оттаму, ветува забрана за доселувањето на муслиманите, затворање на сите џамии и излегување на Холандија од Европската унија.
„Во Холандија има многу мароканско ѓубре поради кое улиците не се безбедни. Доколку сакате да си ја повратите својата земја, доколку сакате Холандија да биде земја на Холанѓаните, тогаш може да гласате само за една партија“, порача Вилдерс.
Оваа изјава Вилдерс ја даде во текот на неговото партиско упориште во Спијкенисе, дел од етнички разноличната индустриска зона околу Ротердам.
Изрази, исто така, увереност дека холандските гласачи ќе им се спротистават на политичките елити и ќе го доведат на власт, што , пак, би претставувало силен поттик за сродните партии во Франција и во Германија, односно Националниот фронт на Марин Лепен и Алтернатива за Германија на Фрауке Петри, чиишто рејтинзи предупредуваат дека оваа 2017 година можна е радикална промена на европската политичка карта.
„И покрај целата омраза и страв на кој поттикнуваат елитите во Лондон и во Брисел, луѓето ја земаа својата судбина во своите раце. Мислам дека тоа ќе се случи и во Холандија, Франција, Австрија и Германија“, порача Вилдерс алудирајќи на британскиот референдум од 23-ти јуни 2016 година кога беше изгласано Обединетото Кралство да излезе од Европската унија.
Партијата на Вилдерс води во анкетите со 17 отсто. Но тоа е само незначително повеќе од поддршката за либералите на актуелниот премиер Марк Руте, чијшто рејтинг порасна токму копирајќи еден дел од неговата противдоселеничка реторика, и благодарејќи на економскиот раст.
Дури и доколку победи на изборите, тешко ќе биде Вилдерс да формирам влада, имајќи предвид дека повеќето големи партии не сакаат со него да коалицираат, сметајќи ги неговите политики за навредливи и дури неуставни. Имајќи ја предвид фрагментираноста на холандската политичка сцена, коалициска влада од четири или повеќе партии речиси е неизбежна.
Вилдерс во декември беше прогласен за виновен за поттикнување на дискриминација, бидејќи ги водеше своите приврзаници со повиците дека сакаат „Помалку! Помалку! Помалку!“ Мароканци во земјата.
Во истражувањето на јавното мнение кое во вторникот го објави холандското министерство за социјални прашања се покажа дека 40 отсто од Турците и Мароканците во Холандија не се чувствуваат прифатени во земјата./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Два питбула убија 13-месечно дете, трагедија во Италија
Утрово, во Италија, во провинцијата Салерно, два питбула го нападнале тринаесетмесечното момче Франческо Пио Д’Амара и го убиле. Кучињата го нападнале во дворот на селската куќа. Мајка му и вујко му се обиделе да го спасат, но кучињата ги повредиле и нив. Според првите информации на полицијата, која на местото на несреќата пристигнала со возило на брзата помош, сопствениците на кучињата биле познајници на мајката. Кучињата биле пуштени на слобода во дворот на семејната куќа, а тие го нападнале детето бидејќи го гледале или како играчка или како закана.
Паола, мајката на детето, по несогласувањата со сопругот, се преселила во Камполонго, каде што изнајмила дел од селската куќа во која живеела сама со синот. Питбулите им припаѓале на сопствениците на куќата, кои живееле во друг дел од двокатната зграда, пишува „Салерно кориере“.
Според соседите, кучињата досега не покажале знаци на агресија. Градоначалникот на Еболи, Марио Конте, изјави дека администрацијата ќе ги сноси трошоците за погребот на детето. Во Италија не постои список на потенцијално опасни кучиња. Во 2006 година Министерството за здравство донесе правилник во кој беше вклучен список на раси што се сметаат за опасни, но оваа одредба подоцна беше укината.
Европа
Европа се загрева најбргу: објавен алармантен извештај
Заедничкиот извештај објавен од „Коперник“ (Службата за следење на климатските промени на ЕУ) и Светската метеоролошка организација (СМО) откри загрижувачки нови податоци. Имено, Европејците преку ден страдаат од невидена топлина, а навечер се под стрес поради непријатните горештини.
Европа е континентот што најбргу се загрева, предупредуваат експертите, затоплување со стапка далеку над глобалниот просек.
Стапката на смртност од топлина е зголемена 30 % во последните две децении во Европа. Економските загуби поврзани со временските услови и климата се проценуваат на 13,4 милијарди евра, според извештајот, како што објави „Гардијан“.
Според извештајот, температурите во Европа биле над просекот 11 месеци минатата година вклучувајќи го и најтоплиот септември од почетокот на евиденцијата. Поради жештините и сушата, имаше големи пожари, кои ги опустошија селата и ги задушија жителите на градовите.
Пожарите беа најинтензивни во јужноевропските земји, како Португалија, Шпанија и Италија. Грција беше погодена од најголемиот шумски пожар во ЕУ, изгореа 96.000 хектари шума, се вели во извештајот.
Од друга страна, обилните дождови предизвикаа смртоносни поплави. Во 2023 година Европа беше околу 7 % повлажна од просекот во последните три децении. „Минатата година Европа беше погодена од најголемиот шумски пожар. Во исто време бевме сведоци на една од највлажните години, силни морски топлотни бранови и разорни поплави“, изјави Карло Буонтемпо, директор на „Коперник“.
Континентот ја доживеа најтоплата година досега. Северозападна Европа го доживеа најтоплиот јуни досега, а поголемиот дел од Европа беше погоден од топлотни бранови за време на продолженото лето од јуни до септември.
На врвот на топлотниот бран во јули, 41 отсто од јужна Европа беше погодена од силен до екстремен топлотен стрес, што ги влошува постојните здравствени состојби и може да го зголеми ризикот од болести.
На Пиринејскиот Полуостров и во Источна Европа имаше суша. Бројот на денови со снежни врнежи беше под просекот, се вели во извештајот, а недостигот на зимски снег во комбинација со летните топлотни бранови значеше дека глечерите на Алпите исклучително се топат. Во последните две години алпските глечери изгубија околу 10 % од преостанатиот волумен.
Сè уште не е сосема јасно како глобалното затоплување предизвикува сè повеќе и повеќе обилни врнежи. Потоплиот воздух може да задржи повеќе влага, што овозможува поекстремни бури. Но, од друга страна, поради сложеноста на климатските промени, врнежите не мора секогаш да се случуваат. Постои многу посилна врска помеѓу глобалното затоплување и топлотните бранови.
Извештајот не дава податоци за минатата година за бројот на смртни случаи поврзани со топлина, но се знае дека имало 70.000 дополнителни смртни случаи поврзани со топлина во 2022 година. „Бројот на смртни случаи поврзани со топлина веројатно ќе биде поголем во 2023 година“, рече климатологот Фридерике Ото од Империјал колеџ во Лондон.
Европа
Напад во Русија, двајца полицајци загинаа, еден повреден
Двајца полицајци се убиени, а еден е ранет кога неидентификуван напаѓач нападнал руска полициска единица во градот Карачаивск во Карачаевско-Черкезија, во Северен Кавказ, соопшти регионалниот оддел на Истражниот комитет на Русија.
Како што се наведува, денеска, непознато лице со огнено оружје пукало неколкупати во полициски одред во градот Карачајевск, а потоа напаѓачот ги украл службеното оружје и муницијата на полицијата, пренесува „Интерфакс“.
Потрагата по напаѓачот е во тек.