Европа
Метеж на австриските граници, колони од 11 километри за излез од земјата
Австриските медиуми тврдат дека наместо метеж на границите за влегување во Австрија, на излезот од земјата се формирала огромна колона.
Според порталот Индекс.хр, станува збор за германски туристи кои тргнале кон Хрватска, и покрај одлуката на Австрија да воведе обврска за тестирање за своите граѓани кои доаѓаат од Хрватска или да ги стават во карантин. Таа одлука предизвика вистинска вербална војна меѓу хрватските и австриските политичари.
Австрија најпрво ја одбележа Хрватска како многу ризична земја за патување кога станува збор за можноста од инфекција со коронавирус, а потоа беше донесена одлука дека сите оние што влегуваат во Австрија, а останаа во Хрватска, дека мора да бидат тестирани пред да се вртат дома.
И покрај очекувањата на Австрија да се создаде метеж на границите при враќање на домашните туристи, колоната на границата е огромна. Но, во спротивна насока.
Имено, на излезот од Австрија има колона од 11 километри. Австриските медиуми, кои ги објавуваат овие информации со неверување, наведуваат дека во колоните има многу Германци, кои патуваат за Хрватска и кои очигледно немаат страв од вирусот.
Наведено е дека повеќе од 80.000 германски туристи влегле во Хрватска минатиот викенд, пишува Нови лист.
Германија нема издадено негативни препораки за патување во Хрватска, ниту, пак, Институтот „Роберт Кох“, кој ги следи епидемиите, не ја прогласи Хрватска за ризична земја.
„Германските туристи во моментов не мораат да се соочат со задолжителни тестови“, пишува „Зидојче Цајтунг“ за коронавирусот во Хрватска и им објаснува на своите читатели дека на голем дел од хрватското крајбрежје има мал број новозаразени лица.
„Вистинските трендови се релевантни за донесување одлука, а не за моменталната слика“, рече германското Министерство за надворешни работи во врска со воведувањето мерки против ширење на коронавирусот за луѓето кои доаѓаат од Хрватска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.