Европа
Москва пред МСП ги отфрла украинските обвинувања за тероризам
Русија во вторникот изјави дека „нема никакви правни ниту фактични основи“ за обвинувањата од страна на Украина којашто пред Меѓународниот суд на правдата (МСП – ICJ) тврди дека Москва го „поддржува тероризмот“ на истокот од украинските територии населени претежно со руско и рускојазично население, каде што по соборувањето на прорускиот претседател Виктор Јанукович во Киев веќе три години траат судирите меѓу силите на киевските власти и милициите на одметнатите региони во Донбас.
„Руската Федерација ги почитува своите обврски од договорот на кој се повикува Украина“ во одбрана на својот став пред МСП, изјави пред судиите водителот за правни работи при руското министерство за надворешни работи, Роман Колодкин.
„Не наоѓаме никакви правни ниту фактички основи“ за мерките коишто ги бара Киев, додал Колодкин.
Украина во понеделникот побара носење итни мерки за Москва да ја прекине „секоја помош“ на бунтовниците, како финансиска, така и воена и во луѓе и „дискриминацијата“, како што велат од Киев, на малцинствата на црноморскиот полуостров Крим кој по референдумот се определи за присоединување на Руската Федерација, а Украина и Западот го сметаат тоа за нелегално руско анектирање на украинска територија.
Поради тригодишниот судир меѓу украинските сили и бунтовниците на југоистокот од земјата, во кој според процените загинале околу 10.000 луѓе меѓу кои и многу цивили, односите меѓу Западот и Русија се спуштија на најниското ниво од крајот на блоковската идеолошка Студена војна.
Украина кон средината на јануари поднесе тужба на судот во Хаг, откако повеќе години потроши протестирајќи против наводното руско финансирање на бунтовниците кои се борат против силите на владата во Киев.
Киев, покрај тоа, сака Русија „во целост да ја надомести штетата настаната поради (…) секој терористички чин кој Руската Федерација го предизвикала, го поттикнала и го овозможил“. Тоа ја вклучува учува и несреќата на авионот на малезиската воздухопловна компанија „Malaysije Airlines“ на летот MH17 од Амстердам до Куала Лумпур во кој загинаа над 270 луѓе претежно холандски државјани. И Киев и Москва меѓусебно се обвинуваат за оваа катастрофа во која авионот наводно е соборен со проектил истрелан од областа на источна Украина, но прашање е чии сили го истрелале./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.
Европа
Кремљ за евентуалното блокирање на „Телеграм“: „Сè повеќе станува алатка во рацете на терористите“
Портпаролот на Кремљ, Дмитриј Песков, денеска изјави дека во моментот не се планира блокирање на социјалната мрежа „Телеграм“ во Русија.
„Не, во моментот нема такви планови“, изјави Песков за каналот „Шот“ на прашањето дали Русија планира да го блокира „Телеграм“.
Тој додаде дека основачот на оваа платформа, Павел Дуров, треба повеќе да внимава како се користи оваа социјална мрежа.
„Секако, би очекувале поголемо внимание од Павел Дуров бидејќи овој уникатен и феноменален ресурс од технолошки аспект, кој порасна, всушност, пред очите на нашата генерација сè повеќе станува алатка во рацете на терористите, се користи за терористички цели“, рече портпаролот на Кремљ, пренесува „РИА новости“.
Како што изјави во средата за „РИА новости“ извор запознаен со ситуацијата, сторителите на терористичкиот напад во предградието на Москва биле регрутирани преку каналот на „Телеграм“, „Глас Хорасан“, сопственост на авганистанското крило на Исламската држава.
Пратеникот на државната Дума од Обединета Русија, Олег Морозов, денеска оцени дека е неопходно да се развие механизам за автоматско блокирање на каналите на „Телеграм“, кои регрутираат терористи користејќи клучни зборови користејќи вештачка интелигенција.