Европа
Ние сме против централизација на власта во ЕУ, порача полскиот премиер
Полска е лојална членка на Европската Унија, но се противи на прекумерната централизација на моќта, порача денеска премиерот на Полска, Матеуш Моравјецки, во писмо до европските лидери.
Брисел долго предупредува дека реформите воведени од полската десничарска влада ја поткопуваат независноста на судството, но конфликтот ескалира овој месец кога Уставниот суд на Полска го оспори клучното начело на интеграција во ЕУ пресудувајќи дека некои од европските норми се некомпатибилни со уставот на државата.
Во екот на продлабочениот спор за владеење на правото се појавија шпекулации и за можен полегзит, но Моравјецки ги уверува европските партнери дека неговата влада нема намера да го следи британскиот пример и да ја изведе Полска надвор од ЕУ.
„Би сакал да ве уверам дека Полска останува лојална членка на Европската Унија“, напиша тој во писмото објавено денеска на владината веб-страница.
Сепак, тој предупреди на опасни појави што ја загрозуваат иднината на Унијата.
„Мислам на постепената трансформација на Унијата во ентитет што би престанал да биде сојуз на слободни, еднакви и суверени држави за да стане организам со вентрална администрација на институции лишени од демократска контрола“, наведува Моравјецки.
Во меѓувреме, со потег што сигурно дополнително ќе ги зголеми тензиите, министерот за правда на Полска, Збигњев Зијобро, денеска ја повика владата да преземе законски мерки против Германија поради, како што рече, системот на политички избор на судии во најголемата нација на ЕУ.
Зијобро е креатор на реформата на полското правосудство и лидер на малцинските конзервативни коалициски партнери во владата на Моравјецки и често се жали на наводно нееднаков третман на ЕУ кон Полска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.