Европа
Секој петок имало забави во резиденцијата на Џонсон за време на заклучувањето, се бара негова оставка
За време на заклучувањето, секој петок се организирале забави со вино и други пијалоци во резиденцијата на премиерот на Даунинг стрит, пишува Мирор, а поради зголемената листа на обвинувања и критики против Борис Џонсон, повиците за оставка станаа се посилни, пренесуваат светските медиуми.
Поранешниот министер Тобијас Елвуд му порачал на Џонсон да води или да се повлече.
„На оваа земја и треба лидерство“, изјавил Тобијас за Би-Би-Си. Неговите коментари уследиле по најновите откритија за петочно дружење на Даунинг стрит додека на сила беа мерките за коронавирус.
Ваквите забави се долгогодишна традиција што ја практикуваат сите влади, потсетуваат медиумите, додавајќи дека истите не биле напуштени ниту по воведувањето на мерките за забрана на дружење на луѓето во затворени простории, со исклучок на членовите на блиското семејство.
„Мирор“ тврди дека персоналот на премиерот купил и фрижидер за да можат секогаш при рака да имаат разладени пијалоци и дека Џонсон знаел за овие собири.
Членот на долниот дом на парламентот, Тори Ендрју Бриџен, кој нема позиција во владата, рече дека Борис Џонсон го изгубил моралниот авторитет да управува со земјата и не е важно дали премиерот знаел или не знаел за тие вински собири во петокот.
„На крајот на краиштата, тој е одговорен за се што се случува во владата и како се однесува. Она на што сме сведоци е култура на однесување според која едно правило важи за нив, а друго важи за нас останатите. Тоа не е прифатливо и јас сум не сум сигурен дека извинувањето може да го исправи“, рече Бриџен.
Според тамошните медиуми досега т.н Комитет од 1922 година добил писмо од околу 20 конзервативни пратеници во кое се изразува недоверба кон раководството на Џонсон. Комитетот е составен од невладини конзервативни пратеници кои се состануваат неделно во Долниот дом за да разговараат за партиски прашања. Кабинетот на премиерот Борис Џонсон и се извини на кралицата Елизабета во петокот, откако беше откриено дека вработените во премиерската резиденција на Даунинг стрит се забавувале до доцна во ноќта пред погребот на принцот Филип, во време кога биле забранети собири во затворени простории.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.