Daily news
Шпанија го ублажи противењето за независна Шкотска во ЕУ, во прашање е Гибралтар
Шпанија, којашто има нерасчистени сметки со Велика Британија околу Гибралтар, го ублажи своето противење за независна Шкотска во Европската унија, со објаснување дека нема намера да го блокира таквиот потег, барем на почетокот, додека британската премиерка Тереза Меј порача во неделата дека Велика Британија му е верна на Гибралтар.
Политичкото тежнеење на Шкотска за независност, заживеано по референдумската одлука од ланскиот јуни Велика Британија да ја напушти Европската унија, Шпанија го смета за контроверзно поради движењето на својата североисточна покраина Каталонија, што е слична ситуација со којашто се соочува оваа земја.
Официјален Мадрид веќе подолг период ја смета за голема препрека за независноста на Шкотска, чиишто граѓани на референдумот во уверливо мнозинство се изјаснија против напуштањето на ЕУ, којашто по Брегзитот би ѝ се приклучила на Унијата. Меѓутоа, шпанскиот министер за надворешни работи Алфонсо Дастис во саботата за весникот El Pais изјави дека „барем на почетокот“, Шпанија „не би ја блокирала таквата одлука“.
Додава дека Шкотска мора да ја напушти ЕУ заедно со Британија, како и дека „потоа ќе се види како натаму“. Истакнува дека официјален Мадрид не гледа благонаклонето на фрагментирањето на Европа.
Дастис во неделата не сакаше да зборува за ветото околу Гибралтар, но ставот на ЕУ околу тоа прашање го оцени како позитивно. „Кога Велика Британија ќе ја напушти ЕУ, европски партнер е Шпанија и ЕУ во врска Гибралтар оттаму е должна да ја земе предвид шпанската страна“, рече ден претходно шефот на шпанската дипломатија во споменатото интервју за El Pais.
Неговите изјави следеа една седмица откако меѓу Лондон и Мадрид дојде до тензии поради прашањето на британската енклава Гибралтар, на јужниот шпански брег.
Европската унија смета дека, по Брегзитот, без одобрувањето на Мадрид не може да се оствари никакво договор меѓу ЕУ и Велика Британија кој се однесува на Гибралтар. Брисел во петокот ѝ понуди право на вето на Шпанија на идните односи на Гибралтар со ЕУ, додавајќи дека Мадрид големи овластувања над британската енклава кога таа веќе нема да биде внатрешно прашање на ЕУ.
Шпанија во 1713 година го предала Гибралтар на Обединетото Кралство, но веќе долг период бара да ѝ биде вратена оваа мала територија.
Велика Британија му е „цврсто“ предадена на Гибралтар и ќе соработува со оваа британска територија за да се осигури најдобар можен исход од преговорите за Брегзитот, порача во неделата британската премиерка Тереза Меј.
Даунинг стрит соопшти дека Меј во разговорот со главниот министер за Гибралтар, Фабијан Пикард, ја повторила „цврстата доследност“ кон оваа територија, нејзините жители и економијата.
„Премиерката рече дека никогаш нема да се согласи на договор кој би го вклучувал предавањето на Гибралтар под суверенитетот на некоја друга држава без слободно и демократски изразената волја на жителите, ниту некогаш ќе влезе во процес на преговори за суверенитетот во кој Гибралтар не би бил една од страните“, изјави портпаролката на британската премиерка./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.