Шпанската влада планира да ги помилува деветтемина лидери за неуспешниот обид за независност на Каталонија во 2017 година, објави денеска премиерот Педро Санчез.

Со помилувањата што ќе ги потврди владата на неделната седница, социјалистичкиот премиер Санчез сака да ги намали тензиите во североисточниот регион и на тој начин да започне преговори меѓу Мадрид и каталонските власти.

„Конфронтацијата не реши ниеден проблем“, рече тој во говорот во познатата опера во Барселона, настан на кој присуствуваа околу 300 претставници на каталонското граѓанско општество.

„За да се постигне договор, некој мора да го направи првиот чекор“, рече Санчез и додаде дека шпанската влада ќе го стори тоа.

Анкетите претходно покажаа дека околу 60 проценти од Шпанците, вклучувајќи ги скоро сите опозициски партии, се спротивставуваат на ослободувањето на деветтемина политичари и активисти приведени во 2019 година за нивната улога во хаотичните и понекогаш насилни настани што ја предизвикаа најголемата политичка криза во Шпанија во последните неколку децении.

Студија на Медицинскиот универзитет во Инсбрук докажува дека по заздравувањето од Ковид-19, се стекнува стабилен долгорочен имунитет.

„Можеме да бидеме многу сигурни дека стекнуваме имунитет. Можеби е полесно и побезбедно да се добие имунитет преку вакцината, бидејќи со тоа се избегнува опасност од долгорочни последици“, изјавил за агенцијата АПА, авторот на студијата, Флоријан Дајзенхамер.

Тој посочил дека оние кои биле подложени на корона имаат имунитет.

„Вирусот разбира само еден јазик, а тоа е убиство со имунитет“, додава шефот на Одделот за невроимунологија.

Дајзенхамер ги советува оздравените и покрај тоа да примат вакцина.

„Вакцината е само дополнителен трик во раката, кој дава конечна сигурност. Тоа е крајната заштита. Не сум запознаен со ниту еден извештај во кој некој што оздравел, а потоа се вакцинирал, повторно се разболел“, вели австрискиот експерт.

Според него, опоравените кои се дополнително вакцинирани имаат скоро стопроцентна сигурност дека нема повеќе да се заразат.

„Анализите јасно покажуваат огромна имунолошка реакција, кога веќе оздравените, по шест до 12 месеци ќе примаат вакцина“, објаснува тој.

Плановите за трета, есенска доза на вакцина против Ковид-19 ќе бидат познати во следните неколку недели, изјави денеска министерот за здравство на Велика Британија, Мет Хенкок.

Министерот за здравство изјави дека владата ги чека резултатите од комбинирањето на вакцини, објави Би-би-си.

Експертите од Службата за јавно здравје (НХС) и познати британски лекари изјавија дека планирањето за вакцинација со трета, засилна доза, мора да започне веднаш, бидејќи ќе се појават поголеми предизвици.

Експертите велат дека треба да се одговори на голем број прашања, вклучително и колку трае имунитетот од вакцините за коронавирус.

Останува и прашањето дали децата треба да се вакцинираат.

„Во моментов се обидуваме да утврдиме која комбинација на вакцини е најефективна“, рече Хeнкок.

Во тестовите за засилување на дозата, низ Англија се комбинираат различни вакцини.

Висок владин функционер изјави дека Велика Британија ќе има корист од новите вакцини на компаниите „Новавакс“ и „Валнева“, кои чекаат одобрување од британското регулаторно тело за медицина.

Досега, близу 60 проценти од возрасните Британци примиле две дози на вакцина, што значи дека се целосно вакцинирани, а повеќе од 80 проценти примиле барем една доза.