Европа
14 милијарди евра претпристапна помош на ЕУ за Балканот и Турција
Европскиот парламент и Советот на ЕУ постигнаа политички договор за претпристапна помош (ИПА 3), со вкупен буџет од 14,162 милијарди евра за Западен Балкан и Турција, за периодот 2021-2027 година.
Тоа е инструмент што ги поддржува земјите кандидати и потенцијалните кандидати на нивниот пат кон реформите и исполнување на критериумите за пристап во Унијата.
„Овој долгоочекуван договор за нашата амбициозна финансиска помош е позитивен, добредојден и силен сигнал за Западен Балкан и Турција. Договорениот пакет претставува солидна инвестиција во иднината на регионот и го поддржува спроведувањето на клучните политички, институционални, социјални и економски реформи во согласност со стандардите на ЕУ и постепеното усогласување со неговите правила и политики“, изјави комесарот за проширување Оливер Вархеи.
Во Брисел наведуваат дека ИПА 3 ќе им даде поддршка во наредниот седумгодишен период, на Северна Македонија, Србија, Црна Гора, Турција, Албанија, Босна и Херцеговина и Косово, ретроактивно од 1 јануари 2021 година.
Нагласено е дека неговото програмирање ќе се заснова на тематски приоритети, а не како досега, на националните рамки на земјите.
„Ова ќе овозможи да се наградат перформансите и напредокот кон клучните приоритети и зголемената флексибилност на земјите на нивниот пат кон пристапувањето кон ЕУ“, се вели во соопштението на Европската комисија.
Комисијата вели дека ИПА 3 ќе се фокусира на стратешко и динамично распоредување на помошта, а приоритет ќе бидат- владеењето на правото и почитување на основните вредности, зајакнување на демократските институции и реформата на јавната администрација, промовирање на реформите за економско управување и конкурентност.
Политичкиот договор постигнат помеѓу Европскиот парламент и Советот на ЕУ, врз основа на предлог на Европската комисија, ќе биде преточен во законски текст, пред ЕУ да го започне официјалното усвојување на ИПА 3.
Според Брисел, усвојувањето на инструментот се очекува на есен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.