Европа
Изборите – тест за Албанија
Европското скенирање на Албанија ќе биде многу опсежно и не очекувам ЕК да ни’ одговори пред да помине време подолго од една година
Европската комисија треба да даде мислење за кандидатски статус на Албанија веднаш по изборите и пред изготвувањето на ноемврискиот извештај за напредокот на земјата.Ова, како што јавуваат албанските медиуми, е оценката на идниот претседавач на Европската унија (ЕУ), Шведска, која вчера преку својот шеф на дипломатија Карл Билт во Брисел ги претстави приоритети во наредните шест месеци од своето претседателствување. „Апликацијата на Албанија е поднесена и ние сигурно го следиме и ќе го следиме начинот на кој ќе се одвиваат неделните избори во Албанија. Скенирањето ќе биде многу опсежно и не очекувам ЕК да ни одговори пред да помине време подолго од една година, исто како со Црна Гора, бидејќи има многу да се работи. И само тогаш, кога прашањето ќе се врати назад во Советот на ЕУ, ние ќе расправаме дали на земјата ќе и се даде кандидатски статус, или дали ќе може да се придвижи уште по напред од тоа”, изјави шефот на шведската дипломатија Карл Билт. Тој, како што пренесува Макфакс, спомна и други приоритети на шведското претседателство како што е либерализацијата на визите за Балканот, како и практичната регионална соработка.„Јасно е дека прашањето на либерализацијата на визите претставува клучна вознемиреност како за нас, така и за земјите на Западен Балкан. Ние освен тоа ќе ја истакнеме потребата за интензивирање на практичната регионална соработка по разни прашања, како што се енергијата или транспортот”, изјави Билт. Шведска ќе го преземе следното шестмесечно претседателство со Европската унија на 1 јули и ќе ги предводи 27 земји членки до 31 декември 2009 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.