Европа
‘Русија денес' ја менува РИА Новости
Рускиот претседател Владимир Путин во понеделникот потпиша указ со кој се реорганизира досегашната најголема државна новинска агенција РИА Новости и на нејзина основа ќе биде формирана меѓународната агенција Русија денес (Россия сегодня), во чии рамки ќе влезат исто така и радиото „Гласот на Русија“, со што треба да јакне угледот на Русија во светот.
Како што се наведува во декретот на рускито претседател Русија денес ќе биде лоцирана во истата зграда во која досега беше РИА Новости, а ќе ја вклучи и руската државна радиодифузна компанија „Гласот на Русија“.
Путин, исто така, на својот кабинет му дал инструкции во рок од еден месеца да ги спроведе активностите за формирање на новата агенција, којашто ќе биде ставена на списокот стратешки претпријатија.
„Главниот фокус на федералната државно обединето претпријатие ‘Меѓународна новинска агенција Русија денес’ ќе биде известување во странство за државната политика и јавниот живот во Руската Федерација“, се наведува во указот потпишан од Путин, објави во понеделникот РИА Новости.
Со истиот декрет се укинува и Државниот фонд за телевизиски и радиопрограми кој преминува во ВГТРК, а федералниот Државен завод за наука минува во агенцијата ИТАР-ТАСС, а направени се и други измени во однос на издавачките куќи и компаниите кои се финансирани од државниот буџет.
Според шефот на администрацијата на рускиот претседател, Сергеј Иванов, вели дека оваа уредба има цел порационално да се користат буџетските средства наменети за државните информативни ресурси, како и за нивно унапредување, и всушност станува збор за нивно намалување а не за зголемување. Додава дека втора цел е „подобрувањето на ефикасноста на државните медиуми“. „Русија се стреми да спроведува независна политика којашто ќе ги штити националните интереси, што не е лесно да се објасни во светот, но тоа може и е неопходно да се стори“, вели Иванов.
Западните медиуми одлуката на рускиот претседател ја коментираа како обид на Путин да ја зајакне својата позиција, иако велат дека и досега огромно мнозинство од руските медиуми се или под негова контрола или му се наклонети. Reuters забележува дека тоа е втора одлука на Путин со којашто ја јакне својата позиција, по неодамнешните протести против него, кои за волја на вистината не беа масовни, а ниту предизвикаа реакции во руското општество.
На чело на новата агенција ќе биде 59-годишниот Дмитриј Киселев, долгогодишeн соработник на многу државни радио програми а во моментов водител на политичкa емисија на телевизијата Россия, за кого Reuters пишува дека своевремено изјавил дека ораните на хомосексуалците не би требало да се пресадуваат./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.