Европа
Британија повика на носење жестоки ‘рестриктивни мерки' кон Русија
Шефот на британската дипломатија Вилијам Хејг повика во саботата да бидат донесени “рестриктивни мерки” против Русија во пресрет на состанокот на министрите за надворешни работи на земјите членки на Европската унија , закажан во понеделник (17-ти март), изразувајќи разочараност од тоа што Москва не го променила ставот за референдумот на Крим, по средбата од петокот во Лондон меѓу рускиот министер за надворешни работи Сергеј Лавров и американскиот државен секретар Џон Кери.
„Многу сум разочаран од тоа што преговорите во петокот не доведоа до дипломатски напредок, кон кој непрекинато се стреми државниот секретар… Жалам што Русија ја одби можноста да го смени курсот и продолжува да го поддржува нелегитимниот, неуставниот и незаконски референдум во недела на Крим”, изјавил британскиот министер за надворешни работи, Вилијам Хејг.
„Велика Британија останува на цврстиот став дека на средбата на министрите за надворешни работи на ЕУ мора да биде даден цврст и единствен одговор. Дојде времето за остри рестриктивни мерки, отколку оние коишто претходно ги прифати ЕУ”, смета Хејг, пренесува BBC.
Шефот на британската дипломатија притоа истакнал дека „вратата за дипломатијата и дијалогот останува отворена, и ја повикуваме руската влада да преземе мерки да се намалат тензиите и да започне директни преговори со украинската влада”.
„Истовремено, ние јасно даваме до знаење дека флагрантното кршење на суверенитетот и територијалниот интегритет на Украина не може да остане без одговор, и ние ќе го поддржуваме украинскиот народ во неговото прави да одлучува за својата иднина во услови на слобода и заплашување и мешање”, рекол Хејг.
Рускиот министер за надворешни работи во петокот по средбата во Лондон со американскиот државен секретар Џон Кери, изјави, меѓу другото, дека „кримскиот парламент веќе донесе декларација за независност, за што жителите ќе гласаат на референдум” во недела дали оваа автономна проруска украинска република е се врати во составот на Русија, во кој била до 1954 година. Притоа Лавров истакна дека и во случајот на Крим треба да се почитува на правото на народите за самоопределување што е содржано во Повелбата на Обединетите нации.
Лавров, исто така, рече и дека Крим за Русија е уште „поспецифичен отколку што тоа се Фокландските острови за Британија” кои се наоѓаат во територијалните води на Аргентина и со кои Обединетото Кралство водеше војна во 1982 година зашто Буенос Аирес бара островите да бидат дадени во нејзино владение./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.