Европа
Албанија и Црна Гора се подготвуваат за можен мигрантски прилив
Албанија ја зајакна контролата на граничните премини кон Македонија и кон Грција и се подготвува за можен прилив на мигранти, како и Црна Гора, поради опасноста дека бегалскиот бран, кој засега е запрен на грчко-македонската граница, може да се прелее кон овие земји.
Како што во четвртокот објавија албанските медиуми, повеќе од 450 припадници на специјалната полиција се упатена на македонскиот премин Ќафасан кај Струга и на уште четири премини кон Грција, каде што ја контролираат границата и се ставени во состојба на приправност. Албанија, исто така, ги отворила своите три поранешни погранични касарни за евентуално прифаќање на мигрантите.
Црна Гора нема официјални информации дека би можела да стане дел од мигрантската рута, но се подготвува за прифаќање на мигранти и бегалци, изјави во четвртокот на седница на владата, министерката за труди и социјална грижа Зорица Ковачевиќ, додавајќи дека нејзиното и министерството за надворешни работи на дневна основа комуницираат со земјите од соседството и со претставниците на Европската унија.
„Следиме што презема ЕУ и какви препораки дава, така што според сите тие движења и ние преземаме активности“, изјави Ковачевиќ за медиумите по седницата на црногорската влада, додавајќи дека „ситуацијата се менува од ден во ден“.
На прашањето на новинарите дали Црна Гора е подготвена за прифаќање на мигрантите, Ковачевиќ потсети на планот на активности доколку се случи прилив на мигрантите, кој владата го усвои минатата година.
„Ако се случи тоа, владата ќе има посебна седница на којашто ќе разговараме за заклучоците во врска и со евентуалната нова рута низ Црна Гора или евентуално за носење одлуки во врска со границите, како владата во тој случај ќе постапи“, изјави министерката. Ковачевиќ додаде дека се извршени подготовки во врска со можното преминување на мигрантите преку Црна Гора или осигурување сместувања за нив.
Црна Гора соопшти дека во овој момент е подготвена да прифати 10.000 мигранти, а доколку земјите од регионот не ги затворат своите граници, би можела дневно да обезбеди сместување за околу 2.000 мигранти./крај/мф/мн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.