Европа
Апсења на исламисти во Германија
Германската полиција уапсила деветмина мажи осомничени дека ги поддржуваат милитатните исламистички групи во Сирија и извршила претреси на неколку куќи и станови во една од најголемите акции против исламистите во Германија,објави во средата германското обвинителство.
Во големата операција изведена во сојузната покраина Северна Рајна-Вестфалија биле ангажирани повеќе од 240 германски полицајци.
Педесет иосумгодишниот Мирза Тамор Б. бил уапсени под сомнение дека прокриумчарил двајца милитанти од Германија во Сирија, додека 31-годишниот Германец Каис Б.О. под сомневање дека регрутирал тројца потенцијални џихадисти и им помогнал да заминат во Сирија, соопшти германскиот државен обвинител.
Осомничени се, исто така, дека испратиле повеќе од три илјади евра како помош за Исламската држава и на други радикални групи.
Според обвинителството во Келн, уште седум германски државјани на возраст меѓу 22 и 35 години се уапсени под сомневање дека краделе по цркви и училишта за да собираат пари за исламистите.
Полицијата извршила претреси во неколку десетици куќи и станови во неколку германски градови и се истражуваат уште 20 осомничени припадници на салафитите, приврзаници на крајно конзервативниот ислам кои се сомничат дека се дел од исламистичката мрежа Некои од осомничените се под истрага дека набавувале лажни пасоши за потенцијалните џихадисти кои сакале да заминат на боиштето во Сирија.
Германските власти проценуваат дека досега најмалку 450 лица заминале од Германија во Сирија, а околу 150 од нив се вратиле. Повеќето од нив се ставени под истрага.
Според Федералната служба за кривични дела на Германија (BKA), околу илјада луѓе во земјата се сметаат за активни поддржувачи на тероризмот, а 230 од нив во перспектива може да извршат терористички чин на германската територија.
На 18-ти октомври во Ахен, исто така во Северна Рајна-Вестфалија, биле приведени двајца осомничени членови на терористичките групи Исламска држава и Ахрар ал-Шам.
Берлин во последните месеци вложува големи напори за контрола на поврзаноста на локалните муслимани со терористите во Ирак и во Сирија. Според Ханс-Георг Маасен, шеф на Сојузната канцеларија за заштита на Уставот, која ја контролира работата на разузнавачките служби, смета исто така дека од почетокот на судирите во Сирија од март 2011 година „неколку стотици“ германски државјани зеле учество во борбите на страната на радикалните групи.
Според податоците на безбедносните служби, 10 отсто од оние германски државјани коишто заминале на боиштата во Ирак и во Сирија потекнуваат од христијански семејства и веднаш влегле во сферата на влијание на радикалните исламисти./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.