Европа
Блер: Ја прифаќам одговорноста, но Садам требаше да биде отстранет
Поранешниот британски премиер Тони Блер без никаква ограда ја прифаќа одговорноста за сите грешки сторени во текот на инвазијата врз Ирак во 2003 година, но и натаму е убеден дека било потребно да се отстрани Садам Хусеин од власта.
Обраќањето на поранешниот британски премиер Тони Блер дојде по објавувањето на извештајот на комисијата предводена од сер Џон Чилкот која по седумгодишна работа утврдила дека инвазијата на Велика Британија врз Ирак не била неопходна и погрешна и во војна се тргнало пред да бидат исцрпени сите мирољубиви решенија, и со неточни разузнавачки податоци за наводно постоење оружје за масовно уништување.
Одлуката Велика Британија да ѝ се приклучи на инвазијата предводена од САД не била ниту одблизу правно заснована, а заложбите на тогашниот премиер Тони Блер за воена акција биле пренагласени, изјави претседателот на истражната комисија Чилкот.
„Без разлика дали луѓето се согласуваат со мојата одлука или не, ја донесов во добра верба и во уверување дека го правам она што е најдобро за мојата земја“, изјави Влер во кусото соопштение по објавувањето на извештајот.
Комисијата не нашла никакво лажиран доказ, измама на членови на владата или тајно верување на американскиот претседател да се оди во војна, истакна Блер.
„Со овој извештај засекогаш би требало да бидат отстранети обвинувањата дека станува збор за лоша намера, лаги и измами. За сите грешки ја преземам целосната одговорност без никаква ограда“, заклучи Блер најавувајќи дека ќе следи негов детален одговор на наодите на комисијата.
„И натаму верувам дека беше подобро да се отстрани Садам Хусеин и дека тоа не е причината за тероризмот кој денес го гледаме насекаде низ светот. Над сé им одавам признание на нашите вооружени сили и изразувам длабоко жалење за губењето животи и болката која со тоа им е предизвикана на семејствата“, изјави поранешниот британски премиер.
Тони Блер беше своевремено еден од најпопуларните британски премиери во историјата, сé додека неговото реноме бесповратно не се урниса со одлуката својата земја да ја втурне во војната во Ирак.
Во средата, по објавениот извештај кој во најмала рака ги доведува во прашање неговите одлуки за почнување на војната и безусловната поддршка за тогашниот американски претседател Џорџ Буш, неговиот углед падна уште пониско. Ниту 13 години по интервенцијата во Ирак, таа не му е простена и во јавноста повторно Тони Блер го нарекуваат лажго и воен злосторник.
Тони Блер беше станар на Даунинг стрит 10, резиденцијата на британскиот премиер, цели десет години, во периодот од 1997 до 2007 година, откако трипати победи на изборите во атмосфера и економски напредок.
Харизматичен и сјаен говорник и шармер, Ентони Чарлс Линтон Блер роден во мај 1953 во Единбург во семејство на виша класа. Парламентарен пратеник првпат станува во триесеттата, а на чело на лабуристите доаѓа во 1994 година, партија којашто ја трансформираше од дното до врвот и ја врани на власт по 18 години опозиција. Првенец на ткн „трет пат“, премиер станува во 43-та година, како најмлад претседател на влада во Британија во речиси 200 години.
Повеќе прагматичен отколку идеолог, Блер со одличен политички инстинкт ја перципираше глобализацијата како можност и успеа да го поврзе економскиот либерализам со подобри јавни услуги.
Во времето на неговите мандати Шкотска и Велс веќе добија поголема автономија, склучен е мирот во Северна Ирска, легализирани се истполовите бракови и усвоени се построги мерки за борбата против тероризмот.
Нападите од 11-ти септември 2001 година врз САД за Блер претставувале пресвртница во надворешната политика. Некритични се согласил со сите ставови на американскиот сојузник Џорџ В. Буш, до таа мера што го нарекуваа негова пудличка. Ги испрати британските војници во инвазиите врз Авганистан и врз Ирак.
Милиони луѓе протестираа на улиците на Лондон и другите британски градови и го обвинуваа дека лажел за постоењето на ирачкото оружје за масовно уништување. Блер подоцна се извини за погрешните информации коишто наводно му ги дале разузнавачките служби и за загубата на животите на 179 британски војници во војната во Ирак.
Успеа да ги добие изборите во 2005 година, но тоа беше со кус здив. Во јули истата година Лондон беше нападнат од терористите кои убија 52 лица. Две години подоцна, и две години пред истекувањето на мандатот, Блер под притисок му го препушта Гордон Браун, кусо пред избувнувањето на глобалната економска криза.
Од тогаш Тони Блер се преобрати во катоцилизам, татко на четири деца, стои подалеку од британската политика и главно времето го минува во странство наплаќајќи за совети на странски челници./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.