Европа
Бунтовниците во Донецк прифатија да отворат коридор за опколените украински војници
Лидерите на самопрогласената Народна Република Донецк го прифатиле повикот на Владимир Путин да отворат коридор за опколените украински војници под услов тие да прифатат разоружување, пренесуваат странските медиуми.
„Со целосна почит кон Владимир Путин, претседател на земјата која прва нé поддржа морално, подготвени сме да овозможиме хуманитарен коридор за опколените украински војници под услов тие да прифатат да го предадат тешкото вооружување и муниција со цел истото повеќе да не биде употребувано против нас“, нагласи премиерот на ткн Народна Република Донецк, Александер Захарченко, пренесува агенцијата Итар-Тасс.
Рускиот претседател претходно упати повик до проруските сили во Украина да обезбедат хуманитарен коридор со цел да им се овозможи на украинските војници, кои се опколени од страна на проруските сили, да го напуштат боиштето.
„Ги повикувам милициите да отворат хуманитарен коридор за владините украински војници кои се опколени, со цел да се избегнат непотребни жртви и да им се овозможи да го напуштат боиштето“, се наведува во соопштението од претседателот на Русија.
Путин, исто така, апелираше да се овозможи итна медицинска помош за сите ранети кои учествувале во воените акции.
Рускиот претседател најави дека Русија ќе продолжи да дава хуманитарна помош за цивилите на истокот од Украина.
Пред една недела првиот руски хуманитарен конвој испорача помош во храна, лекови, агрегати и вреќи за спиење за спасување на загрозеното население на истокот од Украина.
Западот за ваквата постапка ја обвини Москва дека извршила инвазија, бидејќи не обила одобрување од украинската влада за влез на руските камиони во земјата.
Американскиот претседател, Барак Обама, истакна дека најновите слики јасно покажуваат дека руски војници ја преминале украинската граница.
Рускиот амбасадор во ОН, Виталиј Чуркин, истакна дека Киев „води војна против сопствениот народ“ и ја негираше информацијата дека руски борци се присутни во Украина.
„Во источните делови на Украина има руски доброволци. Тоа никој не го крие“, нагласи Чуркин и упати прашање за западните советници кои подолг период се присутни во Киев, како и од каде украинската војска обезбедува оружје.
Чуркин истакна дека сака ОН да испратат порака до Вашингтон да престане да се меша во внатрешните политики на суверените држави./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.