Европа
Челниците на ЕУ отфрлаат неформални преговори со Лондон
Европската унија нема неформално да преговара со Велика Британија за нејзиното истапување од блокот сé додека Лондон не го активира членот 50 од Лисабонскиот договор за ЕУ, истакнаа во понеделникот Германија, Франција и Италија.
Германската канцеларка Ангела Меркел се сретна во понеделникот во Берлин со францускиот претседател Франсоа Оланд и со италијанскиот премиер Матео Ренци. Освен разговорите за излегувањето на Велика Британија од Европската унија, тројцата челници повикаа на „нови поттици“ за јакнењето на Унијата.
„Се согласивме дека членот 50 од европските договори е многу јасен – земјата членка која сака да ја напушти Европската унија мора за тоа да го извести Европскиот совет“, изјави Меркел на заедничката прес-конференција со Оланд и Ренци во Берлин.
„Не може да има никакви натамошни чекори додека тоа не се случи. Дури тогаш Европскиот совет ќе издаде насоки според коишто ќе се преговара за излегувањето. Тоа значи, и ние се согласуваме околу тоа, дека нема да има неформални ниту формални разговори за излегувањето на Британија сé додека Европскиот совет не добие барање за напуштање на Унијата“, прецизираше германската канцеларка.
Оланд и Ренци ја истакнаа потребата што е поскоро можно да се реши тоа прашање, за да може да се насочат на предизвиците со коишто се соочени преостанатите 27 земји членки на ЕУ.
„Не смееме да губиме време, ниту кога станува збор за решавање на прашањето на излегувањето на Обединетото Кралство на соодветен начин, ниту во давањето нов поттик за Европската унија. Нема ништо полошо од неизвесност“, истакна Оланд.
Британските избирачи на референдумот на 23-ти јуни се изјаснија за излегување на Велика Британија од ЕУ со 52 отсто наспроти 48 отсто гласови за останување.
Британскиот премиер Дејвид Камерон претходно во понеделникот во својот говор пред пратениците изјави дека одлуката на британските гласачи за излегување мора да се почитува и дека „Британија самата“ одлучува за тоа кога ќе го покрене процесот на излегување со активирањето на членот 50 од Лисабонскиот договор.
„Британската влада нема да го активира членот 50 во оваа фаза… тоа е наша суверена одлука и неа Британија ќе ја донесе самата“, истакна Камерон./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.