Европа
Ципрас: Нема веќе наредби, ниту штедење од Европа
Грчкиот премиер Алексис Ципрас, челник на радикалната левица Сириза, кој во предизборната кампања ветуваше нов договор за грчкиот странски долг и прекинување на непопуларните мерки за штедење, остро ги нападна партнерите од Европската унија, ветувајќи дека „еднаш засекогаш ќе ја прекине“ политиката на штедење што ја протежира Унијата за надминување на финансиската криза.
Во говорот, што агенциите го оценуваат како пркосен, пред својата пратеничка група откако со својот министер за финансии Јанис Варуфакис се вратија со празни раце, премиерот Алексис Ципрас, порача дека на Грција веќе никој не може да и’ зборува што треба да прави.
„Грција повеќе нема да прифаќа наредби, особено не оние испратени по имејл. Грција повеќе не е бедниот партнер кому му се даваат лекции како да ја напише задачата. Грција има свое јас“, порача Ципрас.
„Не може да се уценува Грција, бидејќи не може да се уценува демократијата во Европа“, нагласи Ципрас, како што забележуваат грчките медиуми, очигледно одговарајќи на тврдиот став на кој Атина наиде во европските престолнини. А особено по ненадејната одлука на Европската централна банка (ЕСВ) да го прекине прифаќањето на грчките државни обврзници во замена за помошта на тамошните банки, и тоа да го префрли врз централната банка што ја отежни и онака сложената финансиска ситуација на земјата којашто се справува со неможноста редовно да го сервисира својот огромен странски долг.
Ципрас и Варуфакис од крајот на минатиот викенд крстосуваа низ Европската унија настојувајќи да ја придобијат поддршката на партнерите за својот план за замена на обврзниците, отпишување на дел од грчкиот долг и олабавување на политиката на штедење, но досега само наидоа на предупредувања да не се обидуваат да не ги почитуваат обврските од сегашната програма за помош на Грција договорени со ткн „тројка“ меѓународните кредитори, Европската комисија, Европската централна банка (ЕСВ) и Меѓународниот монетарен фонд (ММФ).
„Дури не успеавме да се согласиме ниту околу тоа дека не се согласуваме“, изјави во четвртокот по средбата со германскиот министер за финансии Волфганг Шојбле, која беше многу поконтрадикторна отколку на неговиот домаќин.
Меѓутоа, Ципрас тврди дека, сепак, европската турнеја дала и некои резултат. „Во само една седмица добивме повеќе сојузници, отколку во изминатите пет кризни години“, тврди новиот премиер на Грција/крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.