Европа
ЕК потврди дека ќе расправа за владеењето на правото во Полска
Европската комисија следната седмица ќе одржи „ориентациска“ расправа за владеењето на правото во Полска, но тоа сé уште не претставува прв чекор во евентуалното преземање мерки против Варшава, изјави во понеделникот портпаролот на ЕК, Маргаритис Шинас.
„Тоа ќе биде само ориентациска расправа. Тоа не е првиот чекор предвиден со механизмот прифатен во март 2014 година“, изјави Шинас, додавајќи дека за тоа ќе дебатира колегиумот на комесарите на својот прв годинешен состанок, следната среда на 13-ти јануари.
Споменатиот механизам предвидува засилен дијалог со некоја земја членка доколку Европската комисија оцени дека станува збор за кршење на темелните права. Доколку земјата не одговори во предвидениот рок на барањето на ЕК, оваа може да покрене постапка за кршење на основните европски вредност, а таа постапка на крајот може да доведе до предлог на таа земја членка на Европската унија да ѝ биде одземено правото на глас.
Механизмот предвидува три чекора: процена на ЕК, потоа следува препорака и на крајот предлог за конкретни мерки кои може да бидат преземени. Потпретседателот на ЕК, Франс Тимерманс на 21-ви декември упати две писма до полските власти во кои ги повика да ги разгледаат промените од законите кои Брисел ги смета за спорни, односно за Уставниот суд и за медиумите.
Тимерманс изрази загриженост поради законот за медиуми, според кој именувањето на челниците на јавните медиуми преоѓа во надлежност на министерството за финансии. „Слободата и плурализмот на медиумите се клучни за плуралистичкото општество во секоја земја членка која ги почитува заедничките вредности на коишто е втемелена ЕУ“, напиша притоа Тимерманс.
Второто негово писмо се однесува на интервенциите на новата влада на Полска и именувањето на судиите во Уставниот суд на земјата. Шинас рече во понеделникот дека ЕК од Варшава засега уште не ги добила одговорите на тие писма.
Законот е оценет како голема промена во правилата на работата на Уставниот суд.. Судот од петнаесет членови сега мора да ги носи одлуките со двотретинско мнозинство од гласовите и со најмалку тринаесет судии присутни на седницата, наместо досегашните девет. Опозицијата критикува дека сега партијата Прво и правда (PiS) може лесно да ја блокира секога одлука на судот која е спротивна на партискиот став. Во ова партија, пак, тврдат дека законот воведува ред во Уставниот суд и ги отстранува пречките за спроведување на изборните ветувања.
И комесарот за дигитално општество, Гинтер Етингер ја најави можност против Варшава да се активира механизмот кој никогаш досега не е користен, и тоа поради повредите на основните вредности на Европската унија, откако полскиот парламент го донесе законот со кој јавните медиуми се ставаат, како што обвинува тамошната опозиција, под надзор на конзервативната владејачка партија.
Новата полска влада, покрај тоа, ги донесе или ги подготвува законит со кои се менуваат функционирањата на управата, полицијата,и државното обвинителство коешто досега беше независно, а во иднина ќе биде под министерството за правосудство./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.