Европа
ЕП е ‘за критичко преиспитување’ на односите со Русија
Европскиот парламент ја повика во средата Европската унија „критички да ги преиспита“ своите односи со Русија поради нејзината наводна „агресија врз Украина“ и нејзиното мешање во европските политики.
Во резолуцијата усвоена со 494 гласа „за“, 135 „против“ и 69 воздржани, европратениците го осудија „намерното руски кршење на демократските принципи, темелните вредности и меѓународното право со насилно дејствување и дестабилизација на соседните земји“.
„Со агресијата на Украина и со анексијата на Крим, руските челници ги доведоа нашите односи до пресвртница. Кремљ сега треба да одлучи по кој пат тие ќе тргнат, кон враќањето на соработката или кон поголема изолација“, изјави европскиот конзервативен парламентарец Габрелиус Ландбергис, автор на резолуцијата која не е инаку обврзувачка за земјите членки на Европската унија.
„Промена во Русија може да се случи, и ќе дојде, однатре. Додека чекаме, мораме на руските челници да им упатиме силна порака дека сме до жртвите на нивната агресија и оние коишто ги поддржуваат вредностите на кои се заснова Европската унија“, додаде Ландбергис.
Европратениците ги повикаа владите на земјите членки на ЕУ да не склучуваат билатерални договори со Русија, бидејќи тоа би можело да ми причини штета на европското единство во односот кон Москва. Побараа, исто така, и мерки и финансиска помош за „сузбивање на руската пропаганда и дезинформации во и надвор од Унијата“.
Осудувајќи го „мешањата на Русија во европските демократии“, особено преку „поддршката и финансирањето на радикалните и екстремистички партии“, исто така ја повикаа Европската комисија и државите членки да воведат механизми за следење на „финансиската, политичката или техничката помош којашто Русија им ги дава на политички и други организации во ЕУ“.
Француските социјалисти особено предупредуваат на тоа, во врска со партијата од крајната десница Национален фронт (FN), чијашто претседателка Марин Лепен во неколку наврати престојуваше во Москва и редовно пофално се изразува за рускиот претседател Владимир Путин, а во Франција добива сé поголема поддршка меѓу избирачите.
Европските парламентарци на крајот го осудија „арбитрарниот црн список“ со кој на 89 политички и воени личности им е забранет влезот во Русија, како одговор на црната листа на ЕУ за околу 150 физички и правни руски и украински проруски субјекти на кои им е забранет влезот во земјите членки, замрзнат им е имотот и ставени се под остри економски санкции./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Возачот на „Фликсбас“ осомничен за убиство од небрежност во Германија
Против возачот на автобусот кој вчера се преврте на германскиот автопат при што загинаа четири лица, а многумина беа повредени, се води истрага за убиство и нанесување телесни повреди од небрежност, соопштија од јавното обвинителство.
Портпаролот на канцеларијата не можеше да каже дали мажот (62) веќе бил сослушан.
Двокатниот европски превозник „Фликсбас“ со 54 лица, меѓу кои и двајца возачи, излетал од автопатот А9 во близина на Лајпциг во средата наутро и се превртел. Автобускиот оператор претходно пријавил дека во автобусот имало 55 лица. Полицијата соопшти дека загинале четири лица, а шест лица се тешко повредени, а 29 лица се полесно повредени.
Не се соопштени детали за здравствената состојба на повредените.
Инспекторите во моментов се фокусирани на утврдување на причините за несреќата. Сите повредени кои се наоѓаат во болница ќе бидат испрашани, доколку тоа им го дозволи здравствената состојба, изјави портпаролката на полицискиот штаб во Лајпциг како одговор на истрагата.
Ќе се нареди и извештај за анализа на автобуската несреќа, соопштија од јавното обвинителство. Првите резултати се очекуваат само за неколку недели.
Идентитетот на четворицата загинати се уште не беше утврден до четвртокот напладне.
„Се трудиме и се надеваме дека ќе можеме да дадеме информации за тоа во попладневните часови“, изјави портпаролката на полицијата.
Автобусот патувал од Берлин до Цирих.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.