Европа
ЕУ и САД сакаат да гo зголемат притисокот врз Русија
Челниците на Европската унија и’ се заканија во неделата на Русија со нови санкции поради зголемувањето на насилствата во побунетиот исток на Украина, а американскиот претседател Барак Обама, исто така, порача дека ќе го зголеми притисокот врз Москва, а загриженост од ескалацијата на насилствата изрази и папата Франциск, додека рускојазичните бунтовници тврдат дека станува збор за провокација на прозападните власти во Киев кои сакаат да го сменат форматот на преговорите од оној во Минск во оној од Женева.
Во саботата украинската армија соопшти дека бил гранатиран источниот град Мариупол од при што загинале 30 цивили а 96 биле ранети. За тоа ги обвинија проруските бунтовници чии сили се наоѓаат на 25 километри од споменатиот стратешки град со мнозинско рускојазично население кој од април минатата година е под контрола на украинските безбедносни сили. Бунтовниците пак и во неделата тврдат дека станува збор или за грешка во дејствувањето на украинската војска која има позиции во истата област или за провокација од Киев, тврдејќи дека немаат артилерија со која би го извршиле таквиот напад.
Специјалната набљудувачка мисија на Организацијата за безбедност и соработка во Европа (ОБСЕ) утврди дека проектилите дошле од две источна и од североисточна насока, но не прецизираше од чии позиции, бидејќи во областа има распоредено и украински и бунтовнички единци. Исто така, беше објавено дека нападот е извршен со повеќецевни системи „Град“ од североисток и од системот „Град“ од исток, со какви располагаат и двете страни.
Сепак Западот е еднодушен во осудата дека гранатирањето го извршиле бунтовничките сили и вообичаено за тоа ја обвинува Русија којашто според нив ги финансира, вооружува и воено и политички ги помага бунтовниците на истокот од Украина.
„Попуштањето повторно го поттикна агресорот на уште поголемо насилство. Време е да ја заостриме политиката на основа на голите факти, а не на илузии“, оцени на Twitter претседателот на Европскиот совет, Доналд Туск, по разговорот со украинскиот претседател Петро Порошенко за гранатирањето врз Мариупол.
Латвиското претседателство со Европската унија, исто така, предупреди на можно воведување на новите санкции против Русија и побара вонреден состанок на министрите за надворешни работи на членките на ЕУ, само една седмица откако многу од нив најавуваа преиспитување на одлуката за санкциите.
Високата претставничка на Европската унија за надворешна и безбедноста политика, Федерика Могерини, која пред стапнувањето на функцијата и подоцна се зазема за подобрување на односите со Русија, исто така, на Twitter предупреди дека „насилството неизбежно ќе доведе до ново сериозно влошување на односите меѓу ЕУИ и Русија“.
Латвискиот министер за надворешни работи Едгарс Ринкивиц беше подиректен. „Сепаратистичкиот напад врз Мариупол ги прекрши договорите од Минск. Русија целосно е одговорна да ги спречи, инаку следува поголема изолација и нови санкции“, напиша на Twitter во неделата, пренесува Reuters.
Државите членки на ЕУ, меѓутоа, се поделени во поглед на санкциите против Русија и прашање е дали може да постигнат консензус за нивното јакнење, забележуваат во неделата западните агенции.
Американскиот претседател Барак Обама во текот на својата тридневна посета на Индија која започна во неделата изјави дека сака да го зголеми притисокот врз Русија по нападот врз Мариупол.
„Ќе продолжиме со пристапот кој веќе го спроведуваме, поточно со јакнењето на притисокот врз Русија и ќе ги разгледаме дополнителните опции со коишто располагаме, освен воен судир. Многу сме за загрижени поради новото кршење на прекинот на огнот агресијата на сепаратистите (како што западот ги нарекува русојзичните бунтовници од истокот на Украина) со руска поддршка, руска опрема, руско финансирање, руска обука и руски единци“, изјави Обама на прес-конференцијата во индиската престолнина Њу Делхи.
Обама истакна дека САД ќе продолжат да го спроведуваат „економскиот притисок“ врз Русија и „дипломатски да ја изолираат“. „Секогаш бев јасен во поглед на фактот дека не би било добро да се впуштаме во воен судир со Русија“, истакна американскиот претседател, пренесе AFP.
Поглаварот на Римокатоличката црква, папата Франциск, исто така, изрази „голема загриженост“ поради влошувањето на ситуацијата во Украина и побара „продолжување на дијалогот и прекин на непријателствата“. „Со голема загриженост го следам влошувањето на судирот во источна Украина, кој постојано предизвикува многубројни жртви врз цивилното население“, изјави Папата по завршувањето на неделната литургија во Рим.
Од друга страна, пак, потпретседателот на ткн Народен совет на одметнатата самопрогласена Народна Република Донецк, Денис Пуилин, смета дека властите во Киев ќе ја искористат „провокацијата во Мариупол“ за да го сменат форматот на мировните преговори од оние кои се одвиваа во белоруската престолнина Минск ланскиот септември кога беше договорен прекинот на огнот, во оној од швајцарска Женева претходно.
„Намалувањето на бројот на нападите, сепак, покажа други прповокации. Вчера во Мариупол тоа се случи – уште еден обид да се обвинат (проруските) милиции. Да нé претстават во таква светлина“, изјави Пушилин, пренесе РИА Новости.
Според него на Киев „тоа му е неопходно за да го промени форматот за преговори од минскиот во женевскиот каде што ќе ги вклучи и САД. „Тоа е она што го вели самиот Порошенко“, тврди Пушилин.
„Минскиот“ формат на преговорите, кои се одржаа во септември и декември, подразбира учество на преговорите директно меѓу претставниците на самопрогласените републики ви Донецк и Луганск со посредство на ОБСЕ и Русија. Преговорите, пак, во ткн. „женевски“ формат се одвиваат меѓу Украина и Русија со посредство на Европската унија. Властите во Киев повеќепати понудија враќање на преговорите во форматот од Женева со вклучување на САД како посредници. Во мај преговорите во Минск беа одложени поради обновувањето на борбите и бомбардирањето на главните центри на бунтовниците, особено на најголемиот град Донецк./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.
Европа
Шпанскиот државен обвинител бара прекин на истрагата против сопругата на Санчез
Шпанскиот државен обвинител, назначен од кралот по препорака на владата, денеска побара од судот во Мадрид да ја затвори истрагата за корупција против сопругата на премиерот Педро Санчез бидејќи „нема индиции за кривично дело“.
Судијата во Мадрид вчера пријавил дека отворил прелиминарна истрага за 59-годишната Бегоња Гомез. Сопругата на премиерот беше пријавена кај судијата од синдикатот Манос Лимпиос (Чисти раце) врз основа на медиумските извештаи дека давала препораки со нејзин потпис на претприемачи кои се пријавиле на јавни тендери. На овој начин, било наведено во пријавата, таа ја искористила својата позиција и влијание за да можат блиските луѓе да добијат јавни пари и работа.
Организацијата Манос Лимпијас претходно изјави дека својата тужба ја заснова на медиумски извештаи и дека не може да гарантира за нивната вистинитост, а шефот на организацијата, Мигел Бернад, рече дека извештаите биле проследени до судијата од „граѓанска должност“ и негираше дека акцијата била политички мотивирани.
Во 1980-тите, Бернад се натпреваруваше на два европски избори како кандидат на екстремно десничарскиот Национален фронт во 1980-тите.
Манос Лимпијас одлучи да побара од судот да отвори истрага за бизнисот на Гомез откако обвинителите не постапија самоиницијативно, а истражниот судија ќе одлучи дали медиумските извештаи се точни или не, рече тој.
Консултантската компанија на претприемачот Карлос Барабес, според пријавата, добила 10 милиони евра од јавно претпријатие во надлежност на Министерството за економија. Тој претприемач подоцна основал постдипломски курс кој го водела Гомез на Универзитетот Комплутенсе во Мадрид.
Во извештајот се споменува поврзаноста на сопругата на премиерот со туристичката компанија Globalia, која беше спонзор на едукативниот центар „Africa Centre del Instituto de Empresa“ управуван од Гомез. Шпанската влада со 600 милиони евра народни пари ја спаси „Air Europa“, во сопственост на Globalia.
Државното правобранителство испрати жалба до судот во Мадрид, во која се наведува дека нема „индиции дека сторила кривично дело“, објави радиото Ла Секста.
Европа
Лукашенко: Опозицијата и НАТО планираат напад врз Белорусија, ни треба нуклеарно оружје
Претседателот на Белорусија Александар Лукашенко изјави денеска дека неговата земја се соочува со сериозни внатрешни и надворешни закани поради кои треба да го промени својот безбедносен став и да и дозволи на Русија да распореди тактичко нуклеарно оружје на нејзина територија.
Лукашенко, без да обезбеди докази, рече дека белоруската опозиција планира да окупира дел од западот на земјата и да побара поддршка од трупите на НАТО, тврдење што опозицијата го отфрли, нарекувајќи го апсурдно.
На истиот состанок, Иван Тертел, шеф на белоруската безбедносна служба КГБ, рече дека неговите оперативци спречиле напади врз главниот град Минск со беспилотни летала лансирани од членката на НАТО Литванија, но таа земја негира дека организирала каков било напад.
Тертел, исто така, тврди дека белоруските безбедносни сили секојдневно се обидуваат да спречат постојани обиди за шверц на оружје од Украина во Белорусија „со цел таму да извршат саботажа и терористички напади“.
Лукашенко, близок сојузник на рускиот претседател Владимир Путин, често ги истакнува опасностите од нападите на НАТО или Украина, со што ја оправдува блиската воена интеграција со Русија и постојаното одржување на одбранбениот и безбедносниот апарат во состојба на висока готовност.
Лукашенко зборуваше на состанокот на Белорускиот национален конгрес, уставно тело составено од 1.200 пратеници. На состанокот треба да се одобри ажурираниот концепт за национална безбедност и воената доктрина на Белорусија.
Државната новинска агенција Белта ја објави изјавата на Лукашенко дека „актуелната реалност бара промени во безбедносната положба на земјата“.
„Новата тема на Лукашенко е – нуклеарно одвраќање. Оние кои нè туркаат кон тоа треба да можат рационално да ги согледаат директните последици од нивните, најблаго речено, непромислени одлуки“, пишува Белта.
Руски Тасс ја пренесува изјавата на Лукашенко дека во Белорусија се распоредени „неколку десетици парчиња“ руско тактичко нуклеарно оружје во согласност со договорот што тој и Путин го објавија минатата година. Тоа е прв пат Русија да распореди нуклеарни ракети во странска земја од советската ера.
Белоруската опозиција, од кои повеќето лидери се во затвор, а останатите побегнаа во странство, ја исмеа изјавата на Лукашенко дека планираат да окупираат дел од западот на земјата.
„Мислам дека Лукашенко треба да биде коментиран од психотерапевт бидејќи тој живее во свој свет и се чини дека губи допир со реалноста“, рече Франак Виацорка, главен соработник на прогонетиот опозициски лидер Светлана Тихановскаја.
„Овој конгрес е негов очајнички обид некако да ја врати сопствената доверба, но и да му покаже на надворешниот свет дека сè уште има поддржувачи. Се разбира, најлесниот начин да ги консолидира своите поддржувачи е да создаде чувство дека има надворешни непријатели“, изјави Виацорка за Ројтерс.