Европа
Европскиот парламент ги отежнува преговорите со Јункер
Европскиот парламент (ЕП) досега има најмалку шест „заложници“ меѓу кандидати за еврокомесари, наговестувајќи тешки преговори со Европската комисија (ЕК) и можни замени во предложениот тим на новиот претседател на Комисијата, Жан-Клод Јункер, пишува Euractiv.
Досега поминаа 21 сослушување, а со уште шест интервјуа во најава, Европскиот парламент досега покажа резервираност кон најмалку шест кандидати од тимот на Јункер. Чешките европратеници беа првите кои признаа дека нивната сонародничка, Вера Журова, кандидат за еврокомесар за правда, потрошувачка и полова еднаквост, би можела да биде земена како „заложник“ од Парламентот поради нејзиното неубедлива презентација за време на сослушувањето.
Но исто тие сметаат дека уште еден кандидат, Шпанецот Мигел Ариас Кањете има поголеми проблеми од Журова, така што таа можеби треба да се подготви за сослушување околу портфолиото за енергетика, кое треба да ми припадне на Кањете.
Шпанецот се најде под лупата на европратениците поради неговата поврзаност со нафтената индустрија, и последните измени во неговата изјава околу финансиските интереси би можеле да значат дека тој ќе се откаже од трката за оваа позиција.
Унгарскиот кандидат Тибор Наврашич, кандидат за еврокомесар за образование и култура, исто така се соочува со потешкотии, пред се поради тоа што на него се гледа како на верен подржувач на унгарскиот премиер Виктор Орбан и неговиот модел на „нелиберална демократија“.
Да се задржи политичката рамнотежа, судбината на романската кандидатка од редовите на социјалистите, Корина Крецу, кандидат за еврокомесар за регионална политика, исто така се наоѓа во неизвесност, бидејќи Европската народна партија (ЕПП) смета дека нејзината презентација била неубедлива.
Уште двајца кандидати за еврокомесари се соочуваат со притисок од Парламентот, но тие спаѓаат во друга категорија, пред се поради големината на нивните земји. Французинот Пјер Московици, кој од Јункер го доби портфолиото за економски и финански прашања, се смета за тројански коњ од страна на Париз, со намера да и дозволи на својата земја да го надмине буџетскиот дефицит, без да соочи со санкции.
Слично на ова, Британецот Џонатан Хил, кандидат за еврокомесар за финансиска стабилност и финансиски услуги, од страна на некои европратеници се смета како пратеник на Лондон во врвот на ЕУ и е нарекуван „лисица на чело на кокошарникот“.
Портпаролката на Јункер, Мина Андреева за Euractiv изјавила дека новиот претседател на Комисијата со голем интерес ги следи сослушувањата и дека е задоволен од презентациите на членовите на неговиот тим.
„Јункер контактира со претседателот на ЕП, Мартин Шулц и ќе почека сослушувањата да завршат, а дури потоа со Парламентот ќе се разговара околу целосната проценка на состојбата“, изјавила Андреева.
Запрашана околу тоа дали Јункер бил задоволен од презентацијата на Кањете, Андреева изјавила дека тој верува оти сите кандидати уверливо се претставиле пред Парламентот, вклучително и Шпанецот./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.