Европа
ФСБ: САД, Грузија и ЕУ помогнаа во спречување терористички напади на ОИ 2014
САД, Грузија и редица земји од Европската унија им помогнаа на руските безбедносни служби во спречување на терористички напади врз објектите на кои се одржуваа Зимските олимписки игри во Скочи во 2014 година, изјави за новинарите во четвртокот директорот на руската Федерална служба за безбедност (ФСБ), Александар Бортников кој посочи дека Москва предложила меѓународната работна група да ги обнови своите активности и во поглед на Светското фудбалско првенство коешто во Русија ќе се игра во 2018 година.
„Во текот на подготовката и одржувањето на Олимпијадата во 2014 година, заедно со нашите партнери од многу земји, особено Франција, Германија, Австрија, САД и Грузија, успеавме да спречиме серија терористички напади врз олимписките терени, кои беа подготвувани“, изјави Бортников по советувањето на челниците на безбедносните служби.
Говорејќи за механизмот на ваквата меѓународна соработка, директорот на руската ФСБ потсети дека припадниците на специјалните служби на неколку земји, вклучително и на Русија, учествуваа и во обезбедувањето на Европските игри во Азербејџан
„Во осигурувањето на безбедноста на неодамна одржаните први Европски игри во Азербејџан учествуваа претставници на тајните служби на неколку земји, покрај нив и руски структури работеа таму“, рече Бортников.
Според него, имајќи го предвид претстојниот фудбалски мундијал во 2018 година, кој ќе се одржи во Русија, Москва предложила да се обноват активностите на работната група за безбедност на неколкуте земји.
„Со оглед на претстојниот светски фудбалски шампионат во 2018 година, на состанокот свикан по руска иницијатива, беше предложено да продолжат активностите на работната група составена од претставниците на службите на различните земји, којашто функционираше за време на Олимписките игри во Сочи“, посочи Бортников./крај/мф/сн
Извор: РИА Новости
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.